Shillong, Jylliew, 19: Ki arngut ki MLA jongka thaiñ thor ha ri lum Garo kata u MLA ka Phulbari bad u MLA ka Rajabala ki la rai ban ai da ka jignthoh shaka Central Water Commission (CWC) jong ka sorkar pdeng ba kin pynsted ka jingpyntrei ïa ka Rongai Valley Medium Irrigation Project khnang ban kham suna ka jingshlei um sha ki thaiñ thor ha ka por lyiur.
“Nga la ïakren bad u MLA ka Rajabala u Abdus Saleh halor kane bad ngin sa ïathoh shithi lang sha ka CWC ban pynsted ka jingpyntrei ïa katei ka projek ha Rongai khnang ban kham duna ka jingshlei um sha ki thaiñ thor ka ri lum Garo” ong u MLA ka Phulbari u SG Esmatur Mominin.
Ha katei ka Rongai Valley Medium Irrigation Project ki don saw ki jaka ka ba den ïa ka um hynrei kine ki jingden um ki shah pynjulor beit man la u snem haba kiew ka um na ka wah Brahmaputra bad Jingjiram.
Ka jingïasoh ka jingshlei um na ka wah Jingjiram ka Meghalaya bad Brahmaputra jongka Assam ka wanrah ka jingshlei um sha ki thaiñ thor ka rilum Garo namar tang shu la julor katei ka jingden um la tuid beit ka um saw sha Garo Hills.
ïa kane ka Project la sdang naduh ki snem 90 hynrei ka sorkar ba mynshwa ka la pynsangeh noh ha u 2011 bad dei mynta ba kane ka sorkar MDA ka la sdang biang ïa kane ka projek.
“Hadien ka jingleit jurip jong u Symbud Myntri Rangbah bah Prestone Tynsong bad hadien ka jingïakren bad u Myntri Rangbah u Conrad K Sangma ka sorkar jylla ka la mang pisa biang 82 lak na ka bynta kane ka projek bad la phah ruh sha ka CWC ba kan wan jurip bad thaw noh ïa ka DPR ban ïoh mang pisa pat da ka sorkar pdeng”. ong u Mominin.
“ Nga lap ba ki nongtrei ka CWC ka kham suki bha namar lada ngam bakla ïa ka pisa la dep mang mynta la shisnem tam ei ei. Nga la ïakren bad u Symbud Myntri Rangbah la bun sien bad kumjuh ruh bad ki heh ka PWD bad la ïa bud dien ruh naduh CWC hynrei ngam tip na kaei ka daw ba ki pynslem ban leh ïa kane ka kam” ong biang u Mominin.
U la ïathuh tang shu dep ïa kane ka projek ki paid thaiñ thor jongka ri lum Garo kata naduh jongka Phulbari, Rajabala bad Tikrikilla kin lait na ka jingshlei um kaba jur.
