Shillong, Jylliew 16 : Ki pulit ka jylla ha ka sngi Nyngkong ki la ïalam ïa ka Sonam Raghuvanshi sha Meghalaya Institute of Mental Health & Neuro Sciences (MIMHANS) na ka bynta ban phah peit bniah ïa ka jinglong jingman ka por pyrkhat pyrdaiñ jong ka.
Na ka liang u Superintendent of Police ka East Khasi Hills, Bah Vivek Syiem u la ong “La ïalam ïa ka Sonam sha MIMHANS na ka bynta ban phah peit la ka jinglong jingman ka bor pyrkhat pyrdain jong ka ka biang neem. Ïa kane la leh katkum ka jingai jingmut jong ki doktor kiba eksamin ïa ka.”
U SP u ïathuh ruh ba kane ka sienjam kaba ki leh ka long ban peit ruh la ka don neem kano kano ka dak jong ka jingkhuslai jingmut katba ka dang don ha police custody. “Kane kadei ka sienjam kaba ju leh,” u la ong.
La iathuh ba kat kum ki report ne kaiphod jong ki test bad eksamin ïa ka Sonam ha MIMHANS baroh nadong shadong ki biang lut ym don jingduna khyndiat ruh. Ka bor jingmut jingpyrkhat jongka ruh ka biang, kam don kano kano ka jingsngewsih ne khuslai bad ka long beit kumba ju long.
Kumban shu kdew hangne, ka Sonam ryngkat bad u Raj Singh Khushwaha uba la suba ba u dei u baieid jong ka ryngkat bad lai ngut kiwei pat ki paralok kata u Akash Rajput, Vishal Singh Chauhan bad u Anand Kurmi ki la ngat ha police custody na ka bynta phra sngi hadien ba ki la shah kem na Uttar Pradesh bad Indore, Madhya Pradesh hadien ka jingsuba donkti jong ki ban pynïap ïa u kurim jong ka Sonam, u Raja Raghuvanshi ha Sohra dang shen.
Mynta ki pulit ki la ïaid sha ka 6 sngi ka jingtohkit ïa kitei ki san ngut halor katei ka jingjia.
Na ka liang u SP u la ïathuh ruh ba ki pulit kin sa shim ïa rai lano kin ïalam ïa kine ki suba ba donkti ban ïalam sha Sohra na ka bynta ban pynwandur biang kumno la leh ïa katei ka kam bymman.
