Ban peit pyrman ïa kiba don ha ka bor ngi donkam ïa ka National Control Bureau: President HYC

Khliehriat, Naiwieng, 01: Ka Hynñiewtrep Youths Council (HYC) ka la pynjur ïa ka jingdawa na ka sorkar Meghalaya ban thoh sha ka Sorkar Pdeng na ka bynta ban buh noh ïa ka ophis treikam jong ka Narcotic Control Bureau (NBC) ban peit pyrman ïa ka rung ka mih jong u drok.
“Don kiba ong ba wat ki Pulit ki tieng ban bat ïa ki kali jong ki High Level kiba ïaid sharum shaneng. Mano ban tip ïohba kita ki briew ki dei pynban kiba don bynta ha ka kam khaiï drok. Ban tehlakam bad ban peit pyrman ïa ki bor Pulit, ban peit pyrman ïa ki briew kiba don ha ka bor ngi donkam ban don da ka ophis Narcotic Control Bureau (NCB),” la ong u President ka HYC u Bah Roy Kupar Synrem haba kren ha ka jingïalang kaba la long ha ka sngi Thohdieng ha Khliehriat, East Jaiñtia Hills District.
Ka East Jaiñtia Hills ka dei ka distrik kaba ki Pulit ki ju ïohkem khah khah ïa ki snar khaii drok kiba ju wan nabar ka jylla.
“Kine ki dei ki jingdawa ba ka seng ka la buh hakhmat ka Sorkar, hynrei sngewsih ban ong ba naduh ka 4 tarik jong u bnai ba ladep ngi la buh ïa ka shithi hakhmat u Myntri Rangbah ka jylla hynrei mynta la jan shi bnai ngim shym la ïoh ïa ka jubab na u Myntri Rangbah ka jylla,” la ong u Bah Synrem.
“Dei halor kata ka nongrim ba ka seng ka ong lada ka Sorkar kam lah ban ai por ïa ngi, ban khot ïakren ïa ngi halor ki mat jingdawa, ngim banse ba ma ngi ha ryngkat ki paidbah ka jaitbynriew Hynñiewtrep ngin ïa leit tur sha Secreteriat kaba dei ka ophis jong u paidbah kaba ki shakri paidbah ki shong,” u la bynrap.
Haba kam ba ka Jylla Meghalaya ka dei ka lynti ïaid jong ki nongkhaii drok, u Bah Synrem u la ong, “kumba ka long mynta ngim lah ban len ba ka jylla Meghalaya ka la dei ka ïaid lynti (transit route) ban khaii ïa u drok na kiwei pat ki lylla, na kiwei pat ki ri sha kiwei pat ki jylla jong ka ri India. Kaba paw ba ka Meghalaya ka dei kata ka jaka kaba pdiang bad kaba pyndonkam ïa u drok. Lada peit ïa ka jinglong jingman mano ban tip ïoh lehse ki briew kiba don ha ka bor ne kita ki High Level ki dei kiba donkti lang ban pynïaid ïew ïa u drok bad pynrung ïa u drok sha kane ka jylla ka jong ngi.”
U la ong ba ki kyndon jong ka NDPS Act 1988 kiba donkam ban pyntreikam, kata ban set along ïa u briew shi snem haduh lai snem, hynrei kaba sngewsih ka long ba lada peit ha kane ka jylla bun na kine ki nongdih bad ki nongkhaiï kiba la shah kem lai sien saw sien, tang shu poi ha Iingkashari ki la ïoh jamin bad ki ïaid biang sha ki shnong ki thaw bad ki bteng biang ïa ka kam. “Ngi dawa ïa ka Sorkar ba ïa kum kine ki briew dei ban pynngat ha ki kyndon jong ka Preventive Detention lane ban set along ïa ki,” la ong shuh shuh u Bah Synrem.
“Ka por ka la dei ba ngin wad ïa ki lad ki lynti ban ïada ïa ki khun samla ki jong ngi, ïa ki longkmie long kpa, ïa ki hep kiba rit na une u thlen uba lah ban bamduh ïa ka jaitbynriew. Ngi la buh ruh ka jingdawa na ka Sorkar ba ka dei ban thung ïa kita ki iingkashari kiba kyrpang ki ban leh ïa ka jingtohkit kaba kyrpang ban don ruh ïa ki muktiar Sorkar kiba kyrpang kiba dei beit thik tang na ka bynta ki kam khaïi drok. Kumba ka long mynta ki ejahar kiba da ki spah tylli kiba ladep rejistar kaba sngewsih ka long ba ki ejahar ki tyllun na ka por sha ka por haduh ba la thait sa ki ‘riew paidbah ban leit ai sakhi hakhmat ka iïngbishar bad ha kaba kut bun ki nongdie kiba la shah kem bad u drok ha ka met, ha ki kali ka jong ki lait namar ba ngim don ïa ki iingkashari kiba kyrpang, ki kynhun tohkit kiba kyrpang, ngim don ïa kita ki muktiar Sorkar kiba lah ban ïasaid,” la kren diaw u President ka HYC.
“Lada ki bor Pulit ki lah ban tehlakam ïa u drok khamtam napoh East Jaiñtia Hills District ban ym poi sha kiwei pat ki district lane ban ym lah ban ïadie ïathied ha kane ka district ngi ngeit skhem ba ha u snem 2025 un dei u snem u ba ngin sa ïoh ïa ka khubor kaba sngewtynnad, ka khubor kaba bha ba uta u lak ngut u nongdih drok un ym kiew hynrei un hiar, kaba pyni ïa ka jinghiar ne jingduna kiba pyndonkam ïa u drok,” u la bynrap shuh shuh.
“Tang ka HYC da lade hi kan ym lah ban ïaleh ïa kane ka jingeh kaba long kum ka khlam kaba la wan ban lynshop ïa ka jaitbynriew, hynrei ka seng ka donkam ïa ka jingïatreilang ryngkat bad ki Waheh Shnong, ki seng samla, ki seng longkmie, ki VDP bad ki paidbah bad kaba kham kongsan eh ka kam ka dei ka kam jong ka Sorkar ban trei,” la kyrpad u Bah Synrem.
“Ka jaitbynriew kaba don haduh 15-16 lak ngut ki nongshnong shnong kan don haduh lai lak ngut kiba ngop ha u drok hato ngin shaniah bad ngin sngewskhem mo ba kata ka jaitbynriew kan lah ban kiew la ka long ha ka pule puthi, ka kamai ka kajih, kan lah mo ban ïada ïa la ka jong ka ri bad ka jaitbynriew ha ki khep ba ka jaitbynriew ka donkam ïa ka jingïada,” bynrap u Bah Synrem.
Shwa ban pynkut, u President ka HYC u la khot bad wer ïa ki paidbah ka East Jaiñtia Hills ban leit tur sha Secreteriat ha ka 7 tarik mynta u bnai.
Ha kane ka jingïalang la ïashim bynta lang da ki nongïalam ka Jaiñtia National Council (JNC) ba la lamkhmat da u President u Bah Sambormi Lyngdoh, na ka Meghalaya People’s United Front (MPUF) East Jaiñtia Hills District ba la lamkhmat da u President u Bah Kyrshan Blah, na ka Jaiñtia Students Movement (JSM) ba la lamkhmat da u Secretary u Bah Roitre Dkhar, na ka Jaiñtia Women Council (JWC) ba la lamkhmat da ka President ka Kong Ibansara Lamare, na ka Meghalaya Indigeneous Women Council (MIWC) ba la lamkhmat da ka President ka Kong Bythygrace Dkhar bad kiwei kiwei.