Ban pass ïa ka Graduate ka long kaba suk, ban ïoh pat ïa kiba tbit ba shemphang ka long ba eh: Professor Henry

By Mawphor Editor On Aug 23, 2025

Shillong, Nailar 22: Ka Nabon Women’s Synod College ka la pynlong ïa ka prokram Graduation Day 2025 na ka bynta ki samla pule kiba la pyndep ïa ka graduate ha baroh ki subject bad ïa kane ka prokram la pynlong ha Community Hall jong ka Dong Mission Shillong.
Ïa kane ka prokram la sdang da ka jingïaid procession ba la lamkhmat da u kongsan u Professor Henry Lamin Pro Vice Chancellor barim ka NEHU, bud sa u Rev. Dr. GPL Gadew President ka Governing body ka College bad ka Principal ka Kong EC Blah bad kiwei.
Haba kren kum u kongsan u Professor Henry Lamin u la ong ba kane ka dei ka Sngi ka jingjop ïa ki samla pule bad kumjuh ruh ka jingdonkam ban peit shakhmat na ka bynta ka thong bad kaei ban leh ha ka lawei.
U la ong ban pyndep ïa ka graduate ka long kaba suk hynrei ban ïoh ki briew ba tbit ka long kaba eh. “Ka Graduation Day ka dei ka sngi jong ka jingjop bad kadei ruh ka sngi ban pynpuson bad buh jingkylli ba mano ba pynlong ïaphi kiba jop bad mano ba don ha kti ka kjat ban pynpoi ïaphi sha kane ka thong,” ong u Professor Henry da kaba ïathuh ba dei ki nonghikai, ki kmie ki kpa bad kiba halor kiba la pynlong ban poi sha kane ka thong.
U kongsan u la ïalam ruh ïa ka jingshim smai na ka bynta ki samla pule bad u la sam ruh ïa ki syrnot bad kiwei ki jingai sngewbha ha ryngkat lang bad u Reverend Gadew bad ka Principal ka college.
Katba ka Principal ka kong E C Blah haba kren ka la ai mynsiem ïa ki samla pule da kaba ong ba kane kadei ka jingsdang jong ka jingpule donkam ban ïaid shakhmat da ka jingshlur. “Ka pule puthi kam da dei than eh tang ka jingnang jingtip hynrei ka dei ban ïarap ïaphi ban pynkylla ïa ka imlang sahlang bad kadei ka kam kaba sha lyndet jong ka jingjop jong phi,” ong ka kong Blah.
“Iaid shakhmat ban wanrah ki jingkylla bad kane ka jingïaid lynti ka donkam ka jingshlur bad ka jingpyndep ïa ka Graduate kan dei kaba kut hynrei kaba sdang na ka bynta ka lawei bad phi hap ban mad bun ki jingïaleh bad ka pule puthi ka dei ka jingïaid lynti ban ïoh ka jingnang jingtip, ban pyndonkam ïa ki sap bad kane ka Graduation Day ka dei ka jingpynkut ïa kawei ka lynnong bad kaba dei pat ban sdang da kawei pat kaba thymmai,” ong ka Kong Blah.
Katba u Rev Gadew bad ka Miss Ibadajied Kharshïing la pule ïa ka ktien U Blei bad ka jingduwai. La don ka jingrwai bad ka jingshad ka kolshor na ki samla pule nalor kiwei kiwei.