Ban nang kren Khasi bad Garo ki MLA, kan sngewtynnad ban don jinghikai ïa ki MLA: Myntri Rangbah

Shillong, Rymphang 26: U myntri rangbah ka jylla u Conrad Sangma u la ai jingmut ïa ka jingdonkam ban wanrah ïa ka crash course ne ka jingai jinghikai ba malum mala ha ki ktien trai ri na ka bynta ki MLA jong ka jylla tang ba kin ïa nang ban kren ne sngewthuh.
Ha ka por kylli jingkylli, u myntri rangbah u la ong ba ai ba ki MLA Khasi kin nang ïa ki Garo bad kumjuh ruh ki Garo.
Ïa kane u Myntri Rangbah u la jubab ïa ka kynta kylli jingkylli ba la rah da u MLA ka (TMC) na Rajabala u Dr. Mizanur Kazi halor ka jingnang jingstad ha ka ktien lajong.
U myntri rangbah u la ong, “Kan long kaba bha lada ngi don katto katne ki klas na ka bynta ki MLA – ka jinghikai ba malum mala tang ban tip ne sngewthuh (crash course) na ka bynta 10 sngi ne 15 sngi – ha kaba ki dkhot na Garo Hills kin nang ïa ka ktien Khasi bad kiba na Khasi-Jaintia kin nang ia ka ktien Garo.Kane kan phah ïa ka khubor kaba bha…. ba ngi ïalam na khmat.”
U Kazi u la wanrah ha ka jingtip jong u myntri rangbah ka jylla ïa ki jingeh ba ki nongaplai kam ki bym dei ki Garo, ki bym dei ki Khasi ki ïakynduh namar ba ki hap ban thoh eksamin ha ki ktien lajong na ka bynta ki kam District Selection Committee (DSC).
U Kazi u la ong ba katei ka polisi ka lah ban pynduhnong ïa ki samla bym don kam don jam ha ki jaka madan jong ka Garo Hills ha kaba ki ktien trai ri ki dang tlot bha, bad u la kyntu ïa ka sorkar ban pynbiang ïa ki jaka ai jinghikai bad ka por pynkhreh kaba biang.
U myntri rangbah u la pynshai ba kane ka jingleh kam dei ban kyntait.
“Nga kular ïaa baroh ki dkhot ba ïa kane la leh na ka jingthmu ba uno uno uba leit sha ki kam sorkar u dei ban nang ban kren ïa ka ktien trai ri.Kam dei ka sobjek kaba eh – tang ka jingïakren kaba sdang,” u la ong.
U Sangma u la ban jur ba yn donkam ïa ka jingtbit, ym ïa ka jingnang jingstad ha ka thoh ka tar.
“Lada kim lah ban kren Garo bad Khasi, kan ktah ïa ka jingshakri namar ba kin ïadei kam bad ki nongshong shnong.Kane kam dei ban pynduh ïano ïano ruh, hynrei ban pynthikna ïa ka jingïakren ba kongsan bad ki briew kiba ngi shakri.”
U la ong ba bun ki nongshong shnong ha ki jaka ba madan ki la kren Garo lypa.”Nga don shibun ki paralok ha Selsella bad kiwei ki jaka madan ha ri lum Garo, bad baroh ki kren Garo.Kumta, kam don jingeh”, u la ong.
U myntri rangbah u la kdew ruh ïa ki rai jong ka kynhun myntri dang shen kiba la bthah ne hukum ba kidei ba kongsan ban pule ïa ka Khasi bad Garo ha ki skul Lower Primary, ha kaba la dep ban shna ïa ki kot pule.
“Ngi sngew sarong shibun ïa ka ktien tynrai lajong.Da kata ka jingthmu ngi la wanrah ïa ka polisi… hynrei ki briew kim dei ban khuslai.
Hynrei u Dr Kazi u la kdew ba ha ka por ba leh ïa ka eksamin, ki nongaplai ki shah pynbor ban thoh ïa ka grammar bad ka composition bad kam dei ka mat kaba suk tang ka jingnang ne ka jingtip tang ïa ka ktien.
U myntri rangbah u la pdiang ïa ka jingsngewkhia bad u la jubab,”Ka jingsngewkhia shaphang ka grammar bad baroh – kaba nga lah ban bishar bniah – hynrei ka jingthmu jong ngi ka long ban ïohi ba ka jingtip ba sdang jong ka ktien ka don hangta.