Shillong, Risaw 27 : Ka tnad Bording ka la tyrwa sha ka sorkar jylla ba donkam ban don kham bun ki substation ha ka jylla khamtam ha kito ki jaka ba ka laiñ ïaid jong ka bording ka kham jlan.
Na ka liang u Myntri ka tnad bording, u AT Mondal haba kren bad ki lad pathai khubor u la ong ba ki la phah ka jingtyrwa sha ka sorkar jylla bad la ïakren ruh bad u Myntri Rangbah ïa ka jingdonkam ban don kham bun ki sub-station.
“U Myntri Rangbah u la mynjur ban ïarap ïangi na ka platyngka jongka sorkar jylla namar kan slem bha lada ap na ka sorkar pdeng kaba lah ban shim por da ki snem,” ong u Myntri.
Katkum ka jingong jong u, ka jingbuh kham bun ki sub-station kan ïarap ruh ban peit ïa ki jaka ba kham kongsan ha kaba ka lain bording ka long kaba kham jlan bad ka don ka jingthut khah khah ka bording nalor kiwei kiwei.
“Ngi dang pyrshang ban peit ïa kine kijingeh baroh namar phi ïohi ba ki don ki jaka ba ka laiñ bording ka jlan bha kaba don pat tang kawei ka sub-station bad bun ki transformer ki pynïasoh bad katei ka laiñ,” u la ong.
Kumta, u ong ba lada kawei ka thain ka shah ktah, kiwei ki jaka ruh kin shah ktah lang. “Na kata ka daw ngi ruh ngi dang peit halor kane ka bynta,” u la bynrap biang.
U Myntri u la ïahtuh ruh ba katkum ka jingtyrwa bun ki sub-station la thmu ban tei lyngba ka jingbei tyngka jong ka ADB bad kiwei kiwei ki lad.
“Dang shen ngi la dep ban plie ïa kawei ka jaka ha Sohiong constituency bad kawei ha Damlagre. Ngi la dei ruh ban plie sa kawei ka sub-station ha South West Garo Hills kaba ha Purakasïa hynrei na ka daw ka jingwan ka jingshlei um shi bynta jong katei ka jaka la shah rong noh.”
Kumta, u ong ba dei na katei ka daw ba ki la hap ban pynsangeh noh shwa ban plie ïa ka Purakasia sub-station. Shuh shuh u ong ba kin peit ruh ba shen kin sa mih khambun ki sub-station ha kaba ka sorkar ka la bthah ïa ki kontraktor nalor ba ki ophisar ruh ki la trei shitom ban peit ba ka kitei ki sub-station kin sdang treikam noh kham kloi.
