Ban lait na ki jingjia ba sngewsih, ka donkam ban long kiba la khreh : Dr. ES Langshiang, DDMO

Mawkyrwat, ‘Nailar 31 : Ka ophis jong ka District Legal Services Authority (DLSA), South West Khasi Hills District ryngkat ka u District Disaster Management Officer (DDMO), South West Khasi Hills District mynta ka sngi ka la ai ïa ka jingpynshai bad pynsngewthuh paidbah halor ka NALSA Scheme kaba dei la jingshakri kaba ïa dei bad ka aiñ ïa kito ki lanot ne ki shempap kiba shah pynjulor ne shah lynshop ha ki bor ka mariang lyngba ka Legal Services Authorities ha ka hall jong ka Maharam Government Higher Secondary School, Mawkyrwat.
U Dr. E.S. Langshiang, District Disaster Management Officer (DDMO) ka South West Khasi Hills District u la ong ba ka State Disaster Response Force ka ju wan ban ai jingïarap lada wan kino kino ki jingjia ki bym poi pyrkhat kum ka jingshah pynjulor ha ki bor jong ka mariang bad ha kajuh ka por u la ban ba na ka liang ka ophis jong u ka ju ai jingiarap lyngba ka Disaster Management Fund sha ki lanot kiba la sahah pynjulor ha kiba bun ki liang. Shuh shuh u la pynpaw ka jingsngewkmen ban ïathuh ba ka Legal Services Authorities ka don ka bynta kaba khraw ha kaba ai jingshakri ïa ki paidbah lynba ka aiñ ha kaba ïa dei bad kane ka bynta khnang ban pynthikna ba ki lanot kin ïoh ka jingïarap kaba kyrkieh bad kaba biang por.
U la kyntu namarkata, ïa ki khynnah ban rah lem ïa kane ka khubor khnang ba kiwei kin tip lada don kum kine ki jingjia da kaba hikai ruh ïa kiba ki dei ban long kiba kloi ban kner ka kti jingïarap sha kito ki lanot kiba shah ktah ha kiba kum kine ki jingjia bad bynrap ruh da kaba kyntu ïa ki ban pyntip mardor sha ki bor ba dei peit lada don kino kino ki jingjia kiba wanrah da ki bor ka mariang bad ka donkam ruh ba kum ki khynnah skul, ki nonghikai bad ha ki shnong ki thaw ki dei ban long kiba la khreh khnang ban lait na ki jingjia ba sngewsih lada wan ki jinglynshop na ki bor jong ka mariang.
Ka kong N. Hashah, Chief Legal Aid Defence Counsel (CLADC) jong ka DLSA, South West Khasi Hills District haba kren ha ka jingïalang ka la ong ba ka kamram ba kongsan jong ka District Legal Services Authority (DLSA) ka long ban ai jingshakri ei ïa kito ki bym kot ne lah bor ban buh muktiar lane ki nongïasaid-aiñ ha kaba ïa dei bad ki mokotduma bapher bapher bad ka jingthmu ba kongsan jong kane ka NALSA Skhim ha kaba ïa dei bad ka jingïa jingïarap ha kaba ïa dei bad ka aiñ ïa kito ki lanot ne shempap kiba shah lynshop ne shah pynjulor ha ki bor ka mariang kum u jumai, ka jingshlei um bad kiwei kiwei kiba kum kita khnang ban pynthikna ba kin ïoh jingïarap kaba kyrkieh bad kaba biang por lyngba ka sorkar bad kiwei kiwei ki seng trei mon sngewbha.
Ha kajuh ka por ka ïarap ruh ïa ki ban pynïoh jingïarap lada ki duh noh ïa ki jingdon jingem, ki sah khlem iing khlem sem, ki duh noh ia ki kot ki sla ba donkam bad kiwei kiwei lyngba ka aiñ. Ha kajuh ka por ka la pyntip ba la buh ïa ki Para Legal Volunteers (PLV) ki ban ïarap ha ka ban pynsngewthuh bad hikai halor ka hok kaba ki dei ban ïoh bad ban ïarap ïa ki ha ki kam kiba ïa dei bad ka aiñ. Namarkata, ka la wer bad khot shakhmat ïa kiba kum kita ki lanot ban wan shakhmat na ka bynta ban ïoh ïa kitei ki lad jingshakri.
Ïa ka jingïalang ha kane ka sngi la pynïaid da u bah B. Lyngdoh, Assistant Teacher, Maharam Government Higher Secondary School bad kham ha shwa u bah D.G. Nongsiej, Principal Maharam Government Higher Secondary School u la ai ïa ki kyntien pdiang sngewbha katba ka kong D. Sohtun, MJS, Chief Judicial Magistrate-cum-Secretary, District Legal Services Authority (DLSA), South West Khasi Hills District ka la ai ia ki kyntien khublei.