Kynshi, Naitung, 20: Kum ka jingïaleh ban pyllait ïa ki longkmie na jingduk jingkyrduh bad ban kyntiew ïa ka kamai kajih jong ki, ka NRLM Mawthadraishan C&D Block, Liveihood Promotion, ka la pynlong ïa ka jingai jinghikai ïa ki dkhot jong ka SHG kiba hap ha ki thaiñ Kynshi bad ki Shnong ba marjan.
Ïa kane ka jingai jinghikai ba ar sngi kata ha ka 11 bad 12 tarik mynta u bnai, la pynlong ha Ïing dorbar Shnong Kynshi Mawria ha kaba kumba 40 ngut ki dkhot jong ki SHG ki la wan ïashim bynta da ka jingshit rhem bad ha kine ki ar sngi ki la nang ban shna bad pynmih umsoh ruh.
Ïa kane ka jingai jinghikai la ai da u Bah Basil Tympuiñ, Cluster Coordinator Livelihood Promotion bad u Bah Kyrpang Jyndiang, Trainer Food Processing (Fruits and Bakery).
Ka jingai jinghikai ka kynthup ïa ka jingbatai lyngba ki jingthoh ne theory bad kumjuh ruh ka jinghikai da kaba ïa khoh snep, pynlwet ïa ki soh, pynmih um bad kiwei kiwei de ki rukom. La hikai ruh kumno ban nang ban shna ïa ki jingsop kiba biang hadien ba ladep ban thep ïa u soh ha bilor. Ki jait soh ba la pyndonkam ha kaba hikai ki long u soh trun, soh plum, soh jew, ka shini bad kiwei kiwei.
Ha shuwa jong kane ka jingai jinghikai, la pynlong ïa ka jingïalang ba la pynïaid da u Bah Basil Tympuiñ bad la ïoh jingkren ruh na u Bah Kyrpang bad na u Sordar Kynshi Mawria, Bah Powell Sohkhlet.
