K a jingdheng kali ka dei kawei na ki daw bah daw san kaba ki paidbah ki la ngiah hi shoiñ ban ïakren bad pyrkhat hynrei ban kham lait na kane ka donkam ka jingïatrei lang jongki paid nongshong shnong bad ka sorkar. Balei ba ong kumne ka daw ka long ba ym dei ban shim kabu than ïa ka bai jaka puta lada ka sorkar ka don jingthmu ban shna ïa ki surok Bypass. Namar donkam bun tylli ki surok bypass ban duna ka dheng kali.
Kumba long mynta ka jingdon jongka Shillong Bypass na Lad Umroi ban mih beit sha Mawryngkneng ka la ïarap bha ban pynduna ïa ka jingdheng kali ha ki thaiñ Mawlai. Nalor ba la don sha ka Mawlai Bypass kaba la ïarap haduh katta katta namar kiba bun ki kali kiba wan na ki thaiñ Guwahati ne na sharum ban leit beit beit shaduh ki thaiñ Laitumkhrah ki la rung beit na kane ka surok ban mih beit sha Mawkynroh.
Ka sorkar ka la ïoh ruh na ka sorkar pdeng ïa ka jingmang na ka bynta ka Western Bypass hynrei ka jingeh ka long ba ka jingsiew bai jaka ( land compensation) ka heh bun shah ïa ka dor ban shna ïa ka surok. Kane ka la buh ïa ka sorkar jylla ha ka jingeh ban ïakren sha Delhi namar na Delhi ki pynpaw ba sha kiwei kiwei ki jylla ym donkam ban siew bai jaka puta haba la ai ïa ka projek hynrei tang ha Meghalaya ba hap ban siew bai jaka. Hooid ym lah ban len ïa ki jaka puta ha kane ka jylla la long trai da ki riew shimet ym dei da ka sorkar kumba long sha kiwei ki jylla hynrei wat la katta ruh ki paid nongshong shnong ki dei ban pyrkhat na ka bynta ka bha ka miat jong baroh lang donkam ban kham kylluid mynsiem. Hooid ym mut ba ym donkam ban shim ïa ka bai jaka hynrei haba shim ym dei ban ohdor rem than namar lada rem da ka bai jaka ïa ka projek ka sorkar pdeng ruh ka la leh thlia noh ban ai.
Kat kum ba ïoh jingtip ba ka dor jongka Projek Western By Pass ka long tang 800 klur katba ka bai jaka ka poi shaduh ka 1200 klur tyngka. Na kata ka daw ka sorkar pdeng kam nang shuh ban rai halor kane. Hooid na ka liang ki heh jong ka tnad PWD ki la pyrshang ban ïakren halor kane ka kam hynrei kumba long mynta la sngewthuh ba kane ka kam ka dang sahteng. Na kane ka daw ba sa ong ïa ki trai jaka ba kin kham kylluid mynsiem namar lada ïoh sa ka Western By Pass ka la nang ïarap bha ban pynduna ka jingïaid kali na sor Shillong namar kiba kwah ban leit sha ki thaiñ West Khasi Hills ne wat shaduh Garo Hills ki lah ban ïaid noh na katei ka surok.
Nalor kane ha kaba ïadei pat bad ka jingdheng kali ba man la ka sngi ha kane ka nongbah Shillong halor kane ruh ka donkam ka jingïatrei lang jong ki paidbah namar tang ki pulit pynïaid kali kin ym lah da lei lei ruh ban pynduna lada kam don ka jingïatrei lang na ki paidbah. Ym lah ban len mynta kawei kawei ka longïing kaba duna eh ka jingdon kali kan long 2 haduh 3 tylli. Lada ïatrei lang bad pyrshang ban sei tang kawei ka kali ha ka shisngi kane ruh ka la ïarap bha ban pynduna ïa ka jingdheng kali. Nalor kata sa kawei ruh la i donkam ban pyntreikam biang ïa ka Odd bad Even Number ban ïaid ki kali ha ka shisngi shisngi. Tangba kane ka jingpyntreikam Odd bad Even ka dei ban long salonsar naduh ki kali sorkar haduh ki kali jong ki riew paidbah. Kaba sngewdiaw hangne ha jylla jong ngi ka long lada ka sorkar ka thmu ban leh ïa kaba bha na ka bynta ki paidbah lehse kum kane ka jingpyntreikam da ki odd bad even number, khlem pep kin don beit ki ban mih sha surok ban pyrta ba ka sorkar ka leh shilliang khmat hynrei kam long kumta barobor ki bor synshar ki peit ïa ka jingbha jong baroh lang. Kumta ban lait na kane ka jingeh kaba hakhmat eh donkam ïa ka jingïatrei lang jong baroh ki paid nongshnong shnong.
