Tura, Kyllalyngkot 23: U Deputy Commissioner ka West Garo Hills District u Vibhor Agarwal mynta ka Sngi Thohdieng, ula lum ïa ka jingïalang pynïasuk ka Ba-ar, ha Tura Circuit House, ban wanrah ïa ka jingshongsuk bad shong shngaiñ hadien ba kala mih kawei ka jingjia ha Rajabala.
Ha kane ka jingïalang la wan ban ïashim bynta da u Superintendent of Police (SP) u Abraham T Sangma, ki heh ophisar sorkar, ki nongïalam jong ki kynhun bad ki sengbhalang bad ki riewpawkhmat na kylleng ki district jong ka rilum Garo.
Haba kren ha katei ka jingïalang, u Deputy Commissioner ula ong, ba ki bor pynïaid district kila buh hakhmat eh ïa ka jingshngaiñ bad jingïada ïa baroh ki nongshong shnong.
Ula pynpaw ruh ba ka jingïatai ha ka jingïalang kala long kaba seisoh bad la ïoh pdiang ïa ki jingai jingmut na ki nongmihkhmat ïa ka imlang sahlang ban shim ïa ki lad ban ïarap ha ka ban tehlakam ïa kum kitei ki jait jingjia ha ki por ban wan.
Ula maham ruh ba ym dei ban pynsaphriang ïa ki khubor kiba thok namar ba ki khubor ki bym shisha lyngba ki rynsan social media ki lah ban nang pynjur shuh shuh ïa ka jingïakynad bad ula kyntu ïa ki paidbah ba ki dei ban shaniah na ki lad pathai khubor kiba shisha bad ka pyntip ba la sam ruh ïa ki phone number jong baroh ki police station ban ailad ïa ki nongshong shnong ba kin pynshisha ïa kino kino ki jingtip hashwa ba ki thmu ban pynpaw eiei.
Ki bor pynïaid district ki la ïatrei ryngkat ruh bad ki nongïalam niam bad nongïalam shnong, kiba pynlong ïa ki jingïalang ha ki shnong ki thaw ha kylleng ki bynta jong ka West Garo Hills ban pynjaijai ïa ki jingsngewpher bad ban phah kiar ban leh ïa kino kino ki kam kiba long pyrshah ïa ka aiñ.
Ki bor synshar district ki dang peitngor ruh ïa ka jinglong jingman ïa ki rynsan social media bad ïa ka jinglong jingman ha ki shnong ki thaw ban tem ïa kino kino ki dak ki shin ban pynmih ï ka jingïakynad.
U Deputy Commissioner ula pynpaw ba ka jingïatreilang hapdeng ki pulit, ki shnong ki thaw bad ki nongïalam shnong ka long kaba kongsan tam ban pynneh ïa ka shongsuk shongsaiñ. Da ka jingpynjur ïa ki bor pahara ryngkat bad ka jingïakren, ki bor pynïaid district ki don ïa ka jingngeit kaba skhem ba kan sa wanphai biang ka shongsuk shongssaiñ kaba pura.
