Ban kyrshan pisa ïa ka Ialong Secondary School,plie u Myntri ïa ka Fete ba ar sngi ka DS Ialong

Jowai, Nohprah 06 : Shi bynta ban kyrshan pisa ïa ka Ïalong Secondary School Ïalong, na ka liang ka Dorbar Shnong Ïalong hynin ka sngi Palei kala pynlong da ka Fete kaba ar sngi kaba la sdang naduh mynta 4 tarik bad ka 5 tarik u Nohprah, 2025 ha madan Kseh Sylle.
Ïa kane ka Fete la wan ban plie ïaka da u kongsan MLA ka 2-Jowai Constituency ma Wailadmiki Shylla uba dei u myntri ka tnad ka koit ka khiah bad ka kam ïalehkai Sports jong ka sorkar jylla nalor haka jingdonlang ki nongshah khot sngewbha, ki nongïalam shnong, ki khynnah skul bad kiwei de.
Shuh shuh la pynsngew da u Waheh Shnong ma R. Phawa ba ka skul mynta kala kynjoh sha ka 40 snem haka jingshakri ïa ka jingnang jingstad hapoh ka shnong Ialong, ula pyntip ruh ba ka Company dewbilat jong ka Max Cement (Green Valliey Industries Ltd) kala kular ban ïarap pisa na ka bynta ban siew ïaka tulop ki nonghikai 5 hajar shibnai kaba kot sha ka 60 hajar haka shi snem.
Haba ai jingkren na ka liang u Myntri ma Wailadmiki Shylla ula ai khublei kyrpang ïaka Dorbar Shnong kala la lah ban pynlong ïa kane ka Fete ban ïarap pynmih pisa ïa katei ka skul kaba don hapoh ka Shnong, ula pynsngew ruh shapang ki kam pynroi kiba la wanrah hapoh ka shnong ïa kiba ula dep kular bad kila urlong da kaba ai nuksa ïaka surok kaba la wanrah ïa ka jingkylla mynta.
U la ong ki dang don sa kiwei de ki kam kiba dei ban pyndep ha kine ki sngi ban wan da kaba kyntu kum ki nongshong shnong ban long kiba ïaishah ban ïoh pyndep ïa ki jingdonkam baroh.
U la ong ka pule puthi ka long kaba donkam eh haka jingim briew namar khlem ka jingnang jingstad kam long shu kaba biang ha kine ki sngi, kumta u kyntu ïaki khynnah ba kin pynleit jingmut haka pule puthi bad kaba donkam shuh shuh ka long ban don ïa ki skul hapoh ka shnong kum ki Secondary, ki College bad kiwei de.
U la pynbna ruh naka liang jong u bad u Symbud Myntri Rangbah ka sorkar jylla u ma Sniawbhalang Dhar ha kane ka 12 tarik u Nohprah kin leit hiar sha ka pung Ait Nar jong ka Seiñ Raij Ialong ban pynkhreh ïa ka jingshna pynbha pynmiat ïa katei ka jaka kumba long lem kiwei.
Kumjuh ruh ula pynbna ba la dep Sanction ïaka Sub-Center ha Ialong kaba la dep soi kular bad ka tnad ka koit ka khiah. Na ka bynta ban shna ïaka madan ïalehkai phutbol (futsal) hapoh ka Shnong Ialong u Myntri ula kular ban ïarap pynïoh ïa katei ka madan hadien kane ka Financial Year 2024-25.
Kum ka dak ka jingburom ïa ka jinglong Myntri sorkar jong u MLA ma Wailadmiki Shylla na ka liang ka Dorbar Shnong ïalong (Pyllun) mynta hi ka sngi kala pynkup burom ïa u ha ryngkat ki jingai sngewbha.