Ban kyntu ïa ka sorkar jylla ban pynbna sngi shuti ha ka 1 tarik u Naiwieng, ka sngi ïap u J.J.M.Nichol Roy

Shillong, Rymphang 19: U MDC jong ka Laban Mawpren Constituency u Bah Ricky Shullai u la mih jyndat napoh ka ïing dorbar, hadien ba ka Executive Committee (EC) jong ka Khasi Hills Autonomous District Council (KHADC) kaba la ïalam da ka Voice of the People Party (VPP), kala kyntait ïa ka Resolution kaba la wanrah da u Bah Ricky halor ka phang ban kyntu ïa ka sorkar jylla ba kan pynbna kum ka sngi shuti ha ka shi tarik u Naiwieng kaba dei ka lyngkhuh sngi ïap u Rev. JJ M Nichol Roy uba la ju tip kum u kpa jong ka Sixth Scheduled ne ka Khyrnit ha Hynriew.
Haba jubab ïa ka resolution ba la wanrah da u Bah Ricky Shullai uba dei u MDC ka Laban-Mawprem u Bah Winstone Tony Lyngdoh u la ong ba kum ka Executive Committee ngi tip ïa ka jingnoh synniang une u rangbah ïa ka khyrnit ba hynriew.
“Ngi tip ïa ki nia ki jutang ba u Rev JJ M Nichol Roy uba la ïa said hapoh ka Constituent Assembly, wat lada kiba bun ki bein bad khlem niew por hynrei u la lah ban pynkohnguh haduh ban da ïoh ïa ka Sixth Scheduled” ong u CEM.
Shuh Shuh u CEM u la ong ba ha ka shi tarik u Naiwieng kaba dei ka sngi khlad jong une u rangbah, to ngin pynlong kum ka sngi ban ïa sam ïa ki jingtip shaphang jong une u u rangbah bad na ka liang jong ka EC kan ïaleh ban wan da ka resolution kaba kum kane.
Na ka liang u Bah Ricky Shullai haba wanrah ïa ka Resolution u la ong ba la donkam ïa ka sorkar jylla ba kan pynbna kum ka sngi shuti ha ka Shi tarik u Naiwieng kaba dei ka lyngkhuh sngi ïap jong u namar ba ka long shisha ka sngi ba kyrpang ba ïoh ïa ka sixth scheduled bad kane baroh kadei na une u rangbah.
“Kadei ha ka Shi tarik u bnai Naiwieng jong u snem 2025 kaba dei ka sngi shuti ha KHADC bad u la ai khublei ïa ka EM ka Kong Iabandaplin Lyngdoh Nonglait bad kiwei ki dkhot kila khot sngewbha ïa nga sha ka jingrakhe ïa ka lyngkhuh sngi ïap une u rangbah bad dei ha kane ka sngi kala pynlong ïa nga ban pyrkhat ban wanrah da kaneka resolution” ong u Bah Ricky.
Shuh shuh u la ong, “Ngi la ioh ïa ka sixth scheduled ha u snem 1950 bad ha u snem 1952 ngi la ïoh sa ïa ka District Council bad kane baroh kadei na u Bah JJ M Nichol Roy bad ka jingnoh synniang une u rangbah ka lah long shi katdei eh.Kiba ïakhun ban pynioh laitluid ha ki sngi khlad ki ioh shuti te ia une u rangbah ruh dei ban ioh shuti”.
“To ngin ïa kyntu ïa ka sorkar jylla da kaba ngin mynjurlang ne pass ïa kane ka resolution ban pynbna state holiday ne ka sngi shuti ha ka lyngkhuh sngi ïap jong une u rangbah ne u Bah Joy ïa kaba la ju tip paidbah” ong u Bah Ricky.
Ïa kane ka resolution la kyrshan tyngeh da u nongialam ka liang pyrshah uba dei ruh u MDC ka Sohra u Bah Titos W Chyne bad ka Kong Rona Khymdeit kaba dei ka MDC na Nongpoh.
Katba ki MDC kiba pyrshah ïa kane ka resolution ki kynthup ia u Bah Mathew K Makdoh uba dei u MDC ba shu sieh bad u MDC ka Laitkroh-Langkyrdem uba dei ruh u CEM barim u Bah Shemborlang Rynjah.
Na ka liang ki MDC kiba pyrshah kila pynpaw ka sngi shuti kan pynlong ïa ki briew ban kut tang ha ka leit bam khana, leit khwai bad kiwei kiwei, te la donkam ban ban pynlong da ki prokram bapher bapher ban pyntip shaphang une u rangbah kila pynpaw.
Namar ka jingbym weng u Bah Ricky ïa ka resolution ba u la wanrah, kala pynlong ïa u symbud Lamphang ban pan ka jingmynjur na ka ïing ha kaba ki dkhot kiba don ha ka liang synshar kim pdiang satia ia kane ka resolution.