Shillong, Naitung 10: Ka jingïalang jong ka kynhun Myntri sorkar ka la shim ïa ka sienjam kaba donkam ban kyntiew ïa ka karkhana shna phlim ha ka jylla da ka jingai jingmynjur ïa ka Meghalaya Film Tourism Policy 2025.
Halor kane na ka liang u Myntri ki Kam Jngohkai pyrthei u Bah Paul Lyngdoh ula ïathuh ba kane ka policy ka thmu ban pynlong ïa ka Meghalaya kum ka jaka ba long pdeng ban shna ïa ki phlim hapoh ka thaiñ shatei lammihngi bad ban tei ïa ki jingtei kiba donkam ha baroh kylleng ka jylla.
Na ka liang jong u haba ïakren bad ki lad pathai khubor u Bah Paul ula ong ba ïa ka Draft Meghalaya Film Tourism Policy 2025 la dep ban pyllait lai bnai mynshuwa da u Myntri Rangbah ka Jylla Conrad K Sangma bad u ïathuh ruh ba ka Sorkar ka la pan ïa ki jingai jingmut na baroh ki kynhun kiba don bynta ha kane ka kam shna phlim.
U la ïathuh ba ki don palat 200 tylli ki jingai jingmut na ki kynhun bapher bapher ba kynthup na ki nongshna bad nongpynmih phlim ka jylla ba la ïoh ban pdiang bad la pynrung lang hapoh kane ka policy shna phlim.
U la ong, “Mynta ka sngi ngi la wanrah ïa ka policy hapoh ka jingïalang ka kynhun myntri ha kaba ka la don ka jingïakren kaba sani bha bad hadien kane ka kynhun myntri ka la ai jingmynjur ïa ka Policy. Kane ka dei ka sienjam kaba khraw ban pynthikna ba ngin plie ïa ka Meghalaya ha ka rukom kaba heh bha lyngba ka film tourism ne ka jingwan shna phlim ha ka jylla.”
U Myntri ula ïathuh ba ka Meghalaya Film Tourism Policy ka kwah ban pynleit jingmut halor ka jingshisha ba ka Meghalaya ka don ïa bun bah kiei kiei kiba lah ban khring ïa ki nongshna phlim na kylleng ki ri ka pyrthei.
“Ngi thmu ban pynshlur ïa ka jingpynmih phlim ha ka kyrdan National bad International bad ruh ban pynlong ïa ka Meghalaya kum ka jaka ban shna phlim ha ka thaiñ shatei lammihngi bad ruh ban tei ïa ki jingtei kiba donkam ha kylleng ka Jylla,” ula bynrap.
Na ka liang jong u, u la pyntip ba ka Sorkar kan sa thaw ïa ka “Film Facilitation Cell” ka ban wanrah ïa ka jingïatreilang hapdeng ki tnad ka Sorkar, kynthup ka tnad Jngohkai, Arts & Culture bad DIPR ban rah ïa ka nam jong ka Meghalaya kum ka jaka kaba biang eh ban shna phlim la ki dei ki Regional, National ne wat ki International.”
U Bah Paul ula pynbna ruh ïa ka jingkyrshan da kaba ai subsidy ba kot haduh T.1 klur lane 25% na ka jingpynlut ïa ka phlim sha kito ki phlim kiba pyndonkam da ki ktien ba kren bun paid eh hapoh ka Ri bad kumjuh ruh jong ki ri ka pyrthei, kaba ka jingring ïa ki phlim ka dei ban long 75% na ki sngi ring phlim ha Meghalaya.
Haba ïathuh ruh ïa ka jingkyrshan ïa ki Cinema ba don ha jylla, u Bah Paul ula ong, “Nga sngewkmen ban pyntip ba ki nongpynmih phlim ha ka ktien Khasi, Pnar bad Garo kin ïoh ïa ka jingkyrshan subsidy ba T.50 lak ïa kaba ki nongshna phlim ki lah ban ïoh ïa kane ka jingïarap shisien ha man ka arsnem”.
U la pyntip ba kan don ruh ka jingkyrshan pisa ban shna bad pynmih ïa ki TV serial bad ki show, web series bad ki original show ki ban pyni ha ki OTT platform-Hello Meghalaya App, kaba dei ka OTT platform ba la bei tyngka da ka sorkar hapoh ka Ri.
