Ban kyntiew ïa ka BJP ngi donkam ïa ki riew shemphang ban pynïasoh bad ka seng: Hek

Shillong, Jylliew 17: U MLA ka BJP bad u Myntri ka sorkar jylla u Bah AL Hek ha ka sngi baar u la ong ba ka party ka donkam ïa ki briew kiba shemphang ba kin pynïasoh bad ka seng.
“Ngi donkam ïa ki nongïalam kiba tbit ban pynïasoh bad ka party bad kumjuh ruh ban pynkhlaiñ ïa ka party ha Meghalaya,” ïathuh u Bah Hek sha ki lad pathai khubor.
Lah ban pynkynmaw ba ka BJP ka don tang arngut ki MLA ba kynthup ïa u Bah Hek bad u Bah Sanbor Shullai na South Shillong ha ka ïing kaba don 60 ngut ki dkhot.
Haba jubab ïa ka jingkylli halor ka jingpulom jong ka BJP ban kyntiew ïa ka jingdon ki dkhot ha Meghalaya, u Bah Hek u la ong, “Ka party kan ym lah ban kiew tang da ka jingdon jong ki khyndiat ngut ki nongïalam. Ngi donkam ban don bun ki nongïalam kiba tbit, kiba trei ha ka party, khnang ba kiwei pat ki briew kin wan bad ban pynïasoh bad ka, bad dei tang da kane ka lynti ba ka seng kan kiew.”
Ha kawei ka liang u la ïathuh ba ka BJP ha Meghalaya ka khlem shong kli kti hynrei ka la trei kumba 24×7 kynta ban pynkhlaiñ ïa ka party.
Na ka liang jong u Bah Hek u la pynpaw ruh ka jingkyrmen ba shisien ka sngi ka BJP kan kiew ha ka jingdon ki dkhot ne ki MLA bad kumjuh ruh ba kan jop bun ngut hapoh ka jylla.
U la ïathuh ruh ba ka party ha u snem 1984 ka la don tang arngut ki MP bad mynta pat ka la kiew sha 250 ngut ki MP bad ka la long kawei na ki party ba heh duh ha ka ri.
Haba kylli, u Bah Hek u la ong ba bun ngut kiwei pat ki nongïalam ki la pynpaw ka jingangnud ban ïasoh bad ka party.
“Ngi dang ïakren bad kiba bun ki MLA ba mynta bad kumjuh ruh ki MLA barim bad ki nongïalam ba paw khmat bad ngi la ïa syllok ruh bad ki ha kaba ïadei bad kane ka kam,” u la bynrap.