Ban kyntiew bad pynroi ka jingtip ïa ki paidbah ha ka koit ka khiah da ka Health Mela pynlong ka NHM ha Patharkhmah
Nongpoh, Ïaiong 19: Ka ophis jong ka National Health Mission (NHM) Ri-Bhoi District haka jingïatreilang bad kiwei kiwei ki tnad sorkar mynta ka sngi kala pynlong da ka Health Mela ha Patharkhmah Government Higher Secondary School naka bynta ban sam ïaka jingtip ha kaba ïadei bad ka jingkoit jingkhiah bad kumjuh ruh ki lad jingsumar ba ki paidbah ki lah ban ioh lyngba ka tnad ka koit ka khiah.
Ïa katei ka Health Mela ba shisngi la plie paidbah da u Bah Sosthenes Sohtun MLA ka Jirang kum u kongsan, haka jingdonlang u Bah Victor Ranee MDC ka Jirang, ka Dr. M Syiemlieh DMHO ka Ri-Bhoi District bad kiwei kiwei ki ophisar naka tnad ka koit ka khiah bad kiwei ki tnad sorkar.
Haba kren maitphang ha katei ka sngi naka liang ka Dr M Syiemlieh kala ong ba ka thong jong katei ka Block Health Mela ka long ban ai jinghikai bad jingtip sha ki paidbah halor shibun ki skhim bad ki thong jong ka sorkar ha kaba ïadei bad ka koit ka khiah ba ki paidbah ki dei ban tip khamtam ha kiba bun ki lad jingsumar ban lait naki jingjia ba sngewsih.
Kala ong ruh ba kane ka prokram ka long kaba kongsan naka bynta ka jingtip ïaki paidbah ha kaba ïadei bad ki prokram bapher bapher baka sorkar kala buh thong naka bynta ban kyntiew ïaka koit ka khiah hapoh ka district ban ïada naki jait jingpang bapher bapher khamtam ki longkmie ba armet bad ha katei ka sngi la pynlong ruh ki jingai dawai bad jingpeit bñiah da ki doctor bad ïakatei ka Mela yn dang pynlong ha Umsning bad Killing haka 21 bad 22 tarik mynta u bnai.
Naka liang u Bah Sosthenes Sohtun MLA ka Jirang haba kren ha katei ka sngi u la ai ka jingïarohïaka tnad ka koit ka khiah kaba la shim ïaka sienjam ban pynlong kum katei ka jait prokram kaba ai jinghikai bad ai jingmyntoi ïaki paidbah ha katei ka thaiñ ha kaba ïadei bad ka koit ka khiah bad khamtam ban tip ïaki skhim bad ki prokram bapher bapher ba ka sorkar ka wanrah sha ki paidbah da kaba kyntu ruh ïaki paidbah ban shimkhia ban phikir ïaka koit ka khiah.