Ban kylluid ka Shillong yn pynkynriah noh shawei ïa ka Police Reserve bad Central Jail

Shillong, Lber 09 : Da ka thong ban pynkylluid ïa ka nongbah Shillong, ka sorkar Jylla ka la thmu ban pyntreikam bun ki lad ki lynti kynthup ïa ka jingpynkynriah noh ïa ki katto katne ki jaka treikam kiba don baroh shi katta.
Haba pynpaw ïa kane ha ka jingwanrah ïa ka Mangtyngka ha Iing Dorbar Thawain ka Jylla, u Myntri Rangbah ka Jylla Conrad K Sangma u la ong ruh ba na ka bynta ban weng ïa ka jingkhapngiah ha sor Shillong na ka liang ka sorkar ka la pyntreikam ïa ka blueprint kaba bniah.
U Myntri Rangbah u ong ruh ba kine ki kynthup naduh ka jingshna bha ïa ki lad bad ki surok, ka jingbuh kyndon ïa kiba die madan, ka jingpynbun ïa ki jaka pynieng kali, ka jingpynbiang shuh shuh ïa ki kali kamai bad ruh ka jingpyndonkam mynta da ka rukom treikam katkum ka juk stad kata ka Integrated Command and Control Centre.
“Ka jingtyrwa ban pynkynriah noh ïa ka Police Reserve bad ïa ka Central Jail na pdeng ka nongbah Shillong ruh la dep ban pynbeit,” ong u Myntri Rangbah.
Shuh shuh u ong ba ka jingpynkhreh na bynta ka jingpynwandur thymmai ïa ka Khyndailad bad ruh ïa ka Iewduh ka la dep bad la khmih lynti ban lah pyntreikam noh naduh ka samoi treikam jong u 2025 – 26.
U Myntri Rangbah u ong ba kine ki sienja ki long ban pynkhreh ruh ïa ka jylla na ka bynta ban pdiang ïa ka National Games ha u snem 2027 ha ka jylla.