Mawkyrwat, Risaw 07: Ka Mawkyrwat District Sports Association ha ryngkat ka jingïatreilang bad u District Sports Officer, South West Khasi Hills District mynta ka sngi ka la ïoh ban plie pyrda ïa ka lympung ïalehkai kynjatbol kaba la tip kum ka 2nd, 3rd bad ka 4th Division Football League 2024 ha madan Artificial Turf, Nonglang, South West Khasi Hills District.
Ïa kane ka lympung ïalehkai kynjatbol la wan ban plie pyrda da u bah I. Lawrynïang, MCS, Block Development Officer jong ka Mawkyrwat C&RD Block u la long kum u kongsan ha ryngkat ka jingdonlang ki nongkitkam jong ka Mawkyrwat District Sports Association.
Haba kren kum u kongsan, u bah I. Lawrynïang, MCS u la pynpaw ka jingaikhublei ba kyrpang na ka bynta ki samla jong ka South West Khasi Hills District kiba la wan ban ïashimbynta ha kane ka lympung ïalehkai kynjatbol ba la pynlong da ka Mawkyrwat District Sports Association kaba kynthup ha ki lai tylli ki lympung kata ka 2nd, 3rd bad ka 4th Division Football League 2024.
Ha kajuh ka por u la ai mynsiem ruh ïa ki ‘rangïalehkai ba lada ki kwah ban kiew ha ka kam ïalehkai kynjatbol kim dei ban shu pynlut por tang ha kaba peit ha ki telebishon hynrei ki ruh ban da long kiba hikai kilanmet bad trei shitom ïa lade khnang ba kin nang kiew ym tang hapoh ka distrik hynrei wat ha ka jylla bad ka ri India baroh kawei.
Ha kane ka lympung ïalehkai kynjatbol, la ïoh ban pynïalehkai nyngkong ïa ka 3rd Division ha kaba ka Rangmaw SC ka la jop ïa ka Nangkiewshaphrang-Rangblang Football Club da 1 – 0 ba la thep da u Robinstar Lyngdoh ha ka minit kaba 61 katba ka Mawthongkñia Sports Club ka jop da 2 – 1 pyrshah ïa ka Kensimphlang Sports Club ha kaba la thep da u Daslibar Khunjon ha ka minit kaba 26 bad na u Antius Thabah ha ka minit kaba 43.
Ha ka 2nd Division ka Mawjai Sports Club ka la jop da 3 – 0 pyrshah ïa ka Dirang Sports Club ba la thep da u Shhngaiñkupar Myrthong ha ka minit 24 bad 35 katba u Banshanbor Lyngdoh ha ka minit kaba 51.
Ha kajuh hi ka sngi la ïoh ban plie pyrda ruh ïa ka 4th Division kaba dei ruh ka lympung ïalehkai ba nyngkong eh jong mynta u snem ha kaba ka Jerlang Sports Club ka la shah rem noh ha ka Domsohkhai Sports & Cultural Club da 1 – 0 kol bad ïa ka kol la thep da u Kevin Thongnirit ha ka minit kaba 32.
La pynïaid ïa ka jingïalang ba lyngkot da u bah Y.G. Lyngdoh, Working President ka Mawkyrwat District Sports Association (MDSA) bad ki nongkren ki long u bah P. Wanniang, General Secretary jong ka Mawkyrwat District Sports Association (MDSA).
