Ban khlaiñ ka party ha ka election 2023, ai mynsiem u Bah Balajied Rani ïa ki nongïalam UDP Youth Wing ha Ri Bhoi

Nongpoh, Nohprah 06: Kum ka thong ban pynkhlaiñ ïa ka party UDP ha Ri Bhoi bad kum ka jingpynkhreh na ka bynta ka election 2023 ban sa wan ha ka jylla, u Working President ka UDP Ri Bhoi bad uba dei ruh u MDC ka Nongpoh, u Bah Balajied Rani mynta ka sngi u la ai mynsiem bad pynshlur ïa ki nongïalam ka UDP Youth Wing ba ki dei ban trei borbah na ka bynta ban pynkhlaiñ ïa ka party ha kane ka election 2023 ba ka party UDP na Ri Bhoi ka dei ban khur ïa ka nam jop ha baroh ki san tylli ki Constituency.
U Bah Balajied Rani u la pynshlur ïa ki nongïalam ka UDP Youth Wing ban trei na ka bynta ka party, ka dei ha ka jingïalang kaba la long mynta ka sngi ha Sajer Nongpoh, ba ka UDP ka la sei da ki nongïalam ba thymmai ka UDP Youth Wing Ri Bhoi District, kiba sa shim ïa ka lyngkor nongïalam na ka bynta ban pynkhlaiñ ïa ka party.
Haba kren ha ka jingïalang ban pynskhem ïa ki nongïalam ka UDP Youth Wing Ri Bhoi District, u Bah Balajied Rani, u la ong ba ngim lah ban tip ïa ka lawei ka ri jongngi, hynrei ngi don ka jingkyrmen ha ki khun samla ba kin long ki nongkit nongbah na ka bynta ka eh ka shon jong ka ri bad ka jaid bynriew.
U la ong ruh da kaba ai mynsiem ïa ki samla ba ngin lah ban weng ïa shibun ki jingeh bad ki jingsahdien jong ka jaid bynriew, ka dei tang haba ngi don ha ka bor ha ka liang ka synshar ka khadar bad dei namar kane ka daw kum ki samla kim dei ban phai dien bad ki dei ban don ka thong kumno ba ka party UDP kan ioh khur ïa shibun ka jingjop ha kane ka election 2023 khnang ba haba ngi don ha ka bor ngin lah banleh shibun ki kam kiba dei na ka bynta ka jingmyntoi jong ka ri bad ka jaid bynriew.
Shuh shuh, u la ong ruh ba ka jingkhlaiñ jong ka jaid bynriew jongngi, ka shong ha ka tyrpeng ki khun samla bad namar kata, kum ki samla kiba la shim ïa kane ka lyngkor nongïalam hapoh ka party, kim dei ban shong thiah thai, hynrei ki dei ban trei shitom ban pynkhlaiñ ïa ka party bad lada ka party ka khlaiñ ngin lah ban pynjop ïa bun ki kyrtong ka UDP bad dei tang haba ngi don ha ka bor ne ngi ioh bat ïa ka jingsynshar shibun ngin lah ban pyndep ïa ki mat ki jura jong ka jaid bynriew kiba dang sahteng khnang ban khlaiñ ka jaid bynriew jongngi, u la bynrap.