Ban khanglad na ka shongkha khynnah; Pynlong ‘programme & rally’ ka DLSA ha Khliehriat EJHD
Khliehriat kyllalyngkot 21: Ha ka sienjam kaba kongsan ban ïada na ka kam shongkha dang khynnah bad ban pynsngewthuh paidbah halor ki jingktah kiba lah ban mih na kane, ka ophis jong ka District Legal Services Authority (DLSA) bad ki ASHA (Awareness, Support, Help & Action) Unit, East Jaiñtia Hills District hynne ka sngi Palei ka la pynlong ïa ka Legal Literacy Programme halor ka phang “Towards Child Marriage Free- Village Initiative-Cum Rally” hapoh ka NALSA ASHA SOP & Bal Vivah Mukt Bharat Campaign ha Khliehriat, East Jaintia Hills.
Ïa kane ka jingiaid rally la sdang na madan Khliehriat Higher Secondary School bad ïaid lyngba ka surok bah NH-6 sha Khliehriat West Community Hall Junction bad wanphai biang sha madan Khliehriat HSS.
Ha shwa kane ka jingïaid rally la pynlong ïa ka prokram pynshai paidbah da ka jingthmu ban pynsngewthuh ïa ki khynnah skul halor ka jingthmu jong kane ka rally ha kaba la wan ban iashim bynta da ka Additional Public Prosecutor, EJH ka Kong Melody War, Chief Legal Aid Defence Counsel, Kong R. Manar, Deputy Chief Legal Aid Defence Counsel, Kong P. Paswett, Special Educator, EJH, Bah Salanbor Kamar, ki dkhot ASHA Unit, na ka Tnad pulit bad ki khynnah skul.
Ka Additional Public Prosecutor Kong Melody War ha ka jingkren ka la pynshai sha ki khynnah skul halor ki jingpyrkhat bapher bapher kiba don sawdong jong ki jingbatai ïa ki khynnah kumba la kdew hapoh ka aiñ Child Marriage Act.Ka pyntip ba ka khynnah kynthei kaba hapoh 18 snem rta bad u khynnah shynrang uba hapoh ka 21 snem rta la ithuh kum ki khynnah da ka aiñ, bad ka pynshai shuh shuh ba ka jingïathoh shongkurim hapdeng ki shijur kiba dang hapoh kine ki rta la ki dei ki shynrang ne kynthei ym shym la ithuh kum ka kam shongkha kaba dei hok katkum ka aiñ hynrei la shim ba ka long kaba beaiñ.
Ka Kong Melody ka la pynsngewthuh ruh ïa ki khynnah skul halor ki kyndon jong ka POCSO Act bad batai bniah ïa ki jingma kiba khraw.