Shillong, Nailur, 24: U MLA jong ka South Tura u John Leslee K Sangma u la phah da ka jingthoh sha u Deputy Commissioner jong ka West Garo Hills da ka jingkyrpad ba un shim ïa ki sienjam ban pynneh pynsah ïa ka “Silence Zone” sawdong ka Maternity Hospital ha ka lehkmen Puja.
Kane ka hospital ka dei kaba don ïa ka Newborn ICU Unit, kaba la biang lut ïa ki tiar ai jingsumar na ka bynta ki khunlung ba dang shu kha kiba don ïa ki jingpang kiba kham jur.
U Sangma u la pyntip ba ka jingpynngam um ïa ki blei thaw ha ka Ganesh Puja ha ka 31tarik Nailar, 2025, ka la pynmih shaba palat ïa ka jingsawa kaba la ai jingbit tang 50 Decibel, hynrei ka la poi palat ïa ka 110 Decibel. Kane ka la wanrah ïa ka jingkulmar kaba jur ïa ki nongpang ha ka jaka kha khunlung bad ha ka ICU Unit, kaba don hapoh 40-50 meter na ka lynti ïaid proseshon.
“Ka paw shai bha ba ka Central Puja Committee bad ki bor synshar distrik ki la phiel ban bud/pynneh ïa ka aiñ jong ka ri kaba la pynjynjar bad pynsngewsih ïa ki nongpang,” u la ong.
U Sangma u la kyrpad ruh ba dei ban leh da kaba tyngeh pyrshah ïa u Contractor uba mynta u la pynkhein ïa ka aiñ “Silence Zone” da kaba pyndonkam ban ksam thliew, kaba la pynmih ïa ka jingsawa kaba palat 110-114 Decibel.
“Namarkata, nga kyrpad ïa phi ban sngewbha ban peit bniah ïa kane ka kam bad ban shim ïa ki sienjam kiba khia khnang ba kum kine ki jingbakla kin ym jia shuh ha ka por ba leit pynngam blei thaw ha ka Durga Puja ka ban sa long ha ka 2 tarik, Risaw, bad ïa ka jingbit jingbiang jong ki nongpang ha ka Maternity Hospital dei ban ïada katkum ki kyndon jong ka aiñ …” u la bynrap.
U Sangma u la phah ruh ïa ki jingai jingmut ban weng ïa kine ki jingeh.
U la ai jingmut ba dei ban pynkylla noh ïa lynti ïaid proseshon, ban sdang na Parade Ground lyngba ka iew Tura, , Rikman (ban kiar ïa ka Police Hospital ) lyngba ka SP Office, DC Court tad haduh ban da poi ha ka jaka pyngngam um.
“Lada jied biang ïa kajuh ka lynti ïaid, dei ban buh da ka banner kaba thoh ‘Silence zone” ynda la jam ïa ka Hawakhana Petrol Pump haduh lad Old Circuit,” ula ai jingmut.
U la ong ba ka Puja mandap Committee ym ka CPC ka dei ban shim ïa ka jingkitkhlieh lada don kano kano ka jingpynkheiñ kyndon bad ym dei ban shah ban pyndonkam ïa ki tynghung jingpynsawa ha ki kali khlem da ïoh jingbit.
Ym dei ban ai jingbit ban shna ïa ki Pandal ha ki surok paidbah bad ki jingtei kiba ïadei bad ka puja kiba lah ban pynwit ïa ka leit ka wan jong ki kali bad ki paidbah, u la bynrap.
