New Delhi, Risaw 28: U Myntri Sorkar Pdeng ba dei khmih ïa ka Tnad Communications bad Development of North Eastern Region (DoNER), u Jyotiraditya M. Scindia, u la ïashim bynta ha ki lai tylli ki High-Level Task Force (HLTF) ha ka 27 tarik u Risaw, 2025.
Ha kaba sdang jong une u snem, ka Tnad Development of North Eastern Region ka la thaw phra tylli ki High-Level Task Force, ha kaba ïa kawei pa kawei la khlieh da uwei na ki Myntri Rangbah jong ka jylla ka thaiñ shatei lammihngi, ryngkat bad u Myntri Sorkar Pdeng ba dei khmih ïa ka DoNER bad lai ngut ki Myntri Rangbah jong kiwei pat ki jylla ka thaiñ shatei lammihngi kum ki dkhot. Kane ka sienjam ka la mih na ka jingïasngewthuh jingmut ha ka Plenary Session ba 72 jong ka North Eastern Council (NEC), kaba la long ha ka 21 tarik u Nohprah, 2024, ha Agartala. Kine ki task force ki kyntiew ïa ka jingïatreilang hapdeng ki jylla, kaba ïarap ïa ka jingpynïadei ïa ki polisi, bad ban pynthikna ba ki sienjam jingpynroi kin long kiba ïadei bad ki thaiñ ym kiba ïadei bad ki jylla.
U PuLalduhoma, Myntri Rangbah ka Jylla Mizoram, u la pynïaid ïa ka jingïalang jong ka HLTF halor ka North East Economic Corridor, ha kaba la ïashim bynta u Bah Prestone Tynsong, Symbud Myntri Rangbah ka Jylla Meghalaya; u Chandra Mohan Patowary, Myntri ka Tnad Industries & Commerce, Act East Policy, EF&CC, Assam; bad u Puneet Kumar Goel, Chief Secretary ka Jylla Manipur.
Ha kane ka jingïalang, la pyni ïa ka lynti kaba bniah na ka bynta ban weng ïa ki jingeh kiba kongsan ha ki jingdon jingem ba ïadei bad ka ïoh ka kot bad ki jingïarap kiba lyngkot, ba pdeng bad ba jrong samoi. La ban jur ïa ka jingkyntiew ïa ki surok bad ki lynti rel, ka jingpynïasoh liengsuiñ, ki lad ka leit ka wan lyngba ki jaka shong um hapoh ri, ki jingdon jingem ba ïadei bad ka bording, ka jingpynïasoh digital, ki lad khaïi pateng bad ki jingdon jingem ba ïadei bad ka khaïi pateng ha khappud. Ïa ki jingai jingmut ba kordor la ai da ki jylla ba la long dkhot jong ka HLTF kata ka Meghalaya, Assam, bad Manipur. U Myntri Sorkar Pdeng u la sngewnguh ïa ka jingbniah jong ka jingai jingtip bad u la kyrpad ïa ka Sorkar Mizoram ban aiti ïa ka kaiphod ba khatduh jong ka HLTF hadien ba la pynrung lang ïa ki jingai jingmut ba la ïoh.
Ïa ka jingïalang jong ka HLTF halor ka kam jngohkai pyrthei la pynïaid da u Conrad Sangma, Myntri Rangbah ka jylla Meghalaya. Ha kane ka jingïalang la ïashim bynta ruh da u Gajendra Singh Shekhawat, Myntri Sorkar pdeng ba dei peit ïa ka Tnad Kam jngohkai pyrthei bad ka Deiriti, nalor u Myntri Rangbah ka jylla Tripura u Prof. (Dr) Manik Saha bad u Myntri Rangbah ka jylla Sikkim, u Prem Singh Tamang.
U Sangma, u la ai ïa ka kaiphod ba nyngkong halor ki jingai jingmut jong ka HLTF. U la pynpaw ïa ki jinglap ba kongsan, ki jingeh bad ki jingai jingmut na ka bynta ban kyntiew ïa ka kam jngohkai pyrthei ha ka thaiñ shatei lammihngi. U Myntri Sorkar Pdeng ba dei peit ïa ka DoNER u la ai jingmut ban kyntiew ïa ki jaka jngohkai pyrthei ha ka thaiñ shatei lammihngi. U la ban jur ruh ïa ka rukom treikam naduh tynrai ban thaw ïa ka rukom treikam na ka bynta ban kyntiew ïa ka kam jngohkai pyrthei ha ka thaiñ shatei lammihngi bad ka rukom pyntreikam ban khring ïa ki nongjngohkai pyrthei na ki ri ba marjan ruh.
U Myntri Sorkar Pdeng ba dei khmih ïa ka Tnad Deiriti bad kam Jngohkai u la pynpaw ïa ki kam pynroi bad kumjuh ruh ka jingkyntiew ïa ki jingdon jingem ba ïadei bad ka kam jngohkai pyrthei ba la sdang da ka Tnad kam jngohkai ha ka thaiñ shatei lammihngi. U la ban jur ruh ba ka kam jngohkai pyrthei ka dei ka bynta ba kongsan ban kyntiew ïa ka ïoh ka kot ha ka thaiñ.
La pynlong ïa ka jingïalang jong ka High-Level Task Force (HLTF) halor ka rep ka riang bad ka Horticulture hapoh ka jingpynïaid jong u Prem Singh Tamang, Myntri Rangbah ka jylla Sikkim. U Myntri Rangbah ka Jylla Tripura, u Prof. (Dr.) Manik Saha; u Myntri ka tnad ka rep ka riang jong ka jylla Assam, u Atul Bora bad u Myntri ka Tnad ka rep ka riang jong ka jylla Arunachal Pradesh u Gabriel D. Wangsu ruh ki la ïashim bynta, nalor ki heh ophisar na ki Jylla Sikkim, Assam, Arunachal Pradesh bad Tripura, bad ruh na ka Tnad DoNER, Tnad ka rep ka riang jong ka sorkar pdeng, Tnad Food Processing Industries, APEDA, NABARD bad kiwei kiwei ki tnad kiba don bynta.
Ka Task Force ka la bishar bniah ïa ka jingïaid shaphrang jong ki sienjam kiba dang ïaid shakhmat ha ka liang ka rep ka riang bad ka kam horticulture ha kylleng ka thaiñ shatei lammihngi bad ka la pyrkhat ïa ki buit ban kyntiew ïa ka jingpynbha ïa ki kam, ka jingpynkhreh, bad ka jingpynpoi ïew ïa ki mar rep ba kongsan. Ki jingïakren ba kongsan ki long halor ka jingkyntiew ïa ki jingdon jingem ba ïadei bad ka jingbuh pyndait thah ba la pynïasoh lang, ka jingkyntiew ïa ka rukom rep organic, ka jingrep ba la pynshong nongrim ha ki kynhun, bad ka jingpyni ïa ki mar ba kyrpang jong ka thaiñ hapoh ka thup “Organic” ba la pynïasoh lang. U Myntri Sorkar Pdeng, MDoNER, u la pynpaw ïa ka jingdonkam ban pynbha ïa ki kam ha ki jylla bad u la ai jingmut ban thaw ïa ki buit treikam kiba lyngkot, pdeng, bad jrong samoi ban pynthikna ïa ka jingjop bad jingïaineh jong ki kam paidbah ha ka thaiñ.
