Shillong, Naitung 24 : Ki nongïalam jong ka HSPDP ha ka janmiet sngi Palei ki la leit ban kynduh ïa u Myntri Rangbah ka Jylla, Conrad K Sangma ban dawa ba dei ban ai jingithuh noh ïa ka Ktien Khasi kum ka ‘Official Language’, ha ka jylla.
Na ka liang u President ka party, Bah KP Pangniang haba kren bad ki lad pathai khubor hadien ka jingïakynduh u la ïathuh ba ki la aiti ruh bad ka dorkhas sha u Myntri Rangbah ban pynkynmaw biang ba kane kam dei shuh ka sien ba nyngkong ba kum ka party ki la buh ka jingdawa.
“Haduh mynta, ka Ktien Khasi bad Garo ka dang dei ka Associate Language. Ngi na ka party ngi dawa ba dei ban pynlong noh ïa ka Ktien Khasi ka Official Language khnang ba ngin lah ban pyndonkam ïa ka ha Iing Dorbar Thawain jong ka jylla bad ruh ha ki jingthoh,” u la ong.
U President u la ïathuh ba na ka liang u Myntri Rangbah ruh u la pynpaw ïa ka jingsngewtynnad halor kane ka jingwan kynduh jong ki bad ong ba ka HSPDP kadei ka party kaba ju wan barabor ban buddien ïa kane ka mat bad pynkynmaw ruh ïa ka sorkar.
“U la ong ba na ka liang ka jylla ki la dep ban mynjur da ka Resolution bad kane ka la poi shaduh ka sorkar India. Hynrei, ngi pat ngi ong ba ngi sngewnguh ïa kata. Tangba, ngi la ong ba katba ngi dang ap ïa ka jingithuh ïa ka Ktien Khasi ha ka Khyrnit kaba Phra kadei ka bynta jong ka sorkar ban buddien bad pynbor ïa ka sorkar pdeng ban pynstet ïa kane,” u la ong.
Shuh shuh u President u la ong ba ki la kyntu ïa u Myntri Rangbah ba un shimkhia ban peit ba ka sorkar jylla kan ai noh ka jingithuh ïa ka Ktien Khasi kum ka Official Language khnang ban ïoh jingithuh noh ha la ka jong ka jylla.
Haba jubab halor ka jingkylli, u President ka HSPDP u la ïathuh ba na ka liang u Myntri Rangbah un sa rah ïa kane ka mat hapoh ka Kynhun Myntri ban ïa kren halor kane ka bynta namar ïoh don kiwei kiwei ruh kiba dawa watla na ka liang ki party dei tang ka HSPDP kaba wanrah ïa ka jingtyrwa.
