Ban ïoh ïa u OTP, leit pynthymmai ïa u mobile number jong ki ha u Aadhaar: DC

Mawkyrwat, Jylliew, 14: U Deputy Commissioner jong ka South West Khasi Hills District u ai kane ka jingpyntip sha baroh ki nongshong shnong kiba la don ïa u Aadhaar, ba kito kiba khlem ai ïa u mobile number lane bym pyndonkam shuh da u juh u mobile number kin sngewbha ban leit pynthymmai noh da u mobile number ba ki pyndonkam mynta na ka bynta ban ïoh ïa u OTP ne u One Time Password ban pynshisha ïa u Aadhaar jong ki.
Ki nongleit ban pynthymmai ïa ki mobile number jong ki ki lah ban leit ha ki jaka ban pynrung kyrteng Aadhaar, kaba don ha DC ophis, BDO ophis Mawkyrwat C&RD Block, BDO ophis Ranikor C&RD Block bad kumjuh ha ki shnong jong ki katkum ki tarik ba pynbeit da ka ophis.
Lah bthah ruh ba ha ka por ba ki leit ban pynthymmai ïa u mobile number jong ki kin sngewbha ban wan rah tang ka Aadhaar jong ki, u mobile number ba dang treikam bad ki hap wan hi da lade ha ki jaka pynrung kyrteng Aadhaar.