Shillong, K’Lyngkot 09 : Ka Meghalaya State Council of Contractors and Suppliers Welfare Association (MSCCSWA) kan pynlong ïa ka General Meeting ha ka 16 tarik u Kyllalyngkot, naduh 2 baje mynsngi shaneng, ha Conference Hall jong ka Bharat Scouts and Guides, Shillong.
Lyngba kane ka jingpynbna, ka MSCCSWA ka khot bad ka wer ïa baroh ki contractor kiba dei dkhot jong ka Association, bad ruh ïa kiwei pat ki contractor kiba kwah ban ïasnoh bad ka Association, la ki dei na ka jaidbynriew Khasi, Jaintia lane Garo, ban wan sha kane ka jingïalang paidbah.
La pyntip ruh ba ha kane ka General Meeting yn sa ïakren paidbah halor ki jingeh bad ki mat jingïakren ba kongsan kiba ïadei bad ka jingïaid jong ka Association, kynthup ruh ïa ka jingïathuh paidbah balei ba la seng ïa ka MSCCSWA, bad kumno kane ka Association kan shakri ïa ka bha ka miat jong ki contractor ba la register da ka Sorkar ha ka Jylla Meghalaya.
Katkum ka kyrwoh la ong ruh ba don shibun kiwei ruh ki agenda ba la pynkhreh ban ïakren bad jingïasyllok paidbah ha kane ka jingïalang, khnang ba yn lah ban wad ïa ki lad ki lynti ban pynbha bad jingïada ïa ki hok bad ki jingïoh jingïarap jong ki contractor ha ka Jylla.
“Namarkata, la kyrpad ïa baroh ki contractor ba don jingïadei bad kane ka bynta ban wan shim bynta shitrhem ha kane ka jingïalang paidbah da jingshngaiñ khlem da shah ïalam bakla ha kiwei pat,” ong ka kyrwoh ba la phah da u Bah Amos Wahlang, Organising Secretary ka MSCCSWA.
