Ban ïarap ïa ki paidbah pynlong ka SELD Committee da ka jingsumar ei ha shnong Synnei
Synnei, Rymphang 09 : Ka Social & Economic Life District Committee,(SELD) jong ka District Tyngnger kaba dei kawei ka tnad treikam jong ka Jingïaseng District Tyngnger, East Khasi Hills kaba hap hapoh ka Shela Presbytery ka la ïoh ban pynlong ïa ka jingai jingsumar ei ne ka free medical camp ïa ki paidbah ba la pynïaid da ka SELD Committee, ha ka jingïatreilang bad ka Comnunity Health Center (CHC) Mawsynram ba la don lang da u Dr. R. Suchiang uba dei u Medical & Health Officer ryngkat ka kynhun jong u.
Ïa kane ka jingai jingsumar ei ne ka free medical camp la pynlong ha ka shnong Synnei, East Khasi Hills kaba hap hapoh ka Mawsynram C&RD Block, kaba dei kawei ka shnong kaba kham jynjar bha ba kiwei de ki seng trei mon sngewbha ba kin poi ha katei ka jaka namar ka long kaba eh ban ïaid ban ïeng bad ka long ruh kaba jngai kaba ki pait nongshong shnong ki ju mad shu buh ki jingeh.
Ha shwa ban pynlong ïa ka jingai jingsumar la ïoh ban pynlong ïa ka jingïalang ba lyngkot, ha kaba u Dr R. Suchiang, Medical & Health Officer u la ai ka jingkren na ka bynta jong ki nongshong shnong ban pynsngew thuh ba ki dei ban shimkhia ban phah sumar namar lada kim shimkhia kan lah ban buh jingeh ïa ki hadien khamtam ki khynthei kiba armet.
Haba phai pat sha kane ka tnad treikamCommitte Jingïaseng District Tyngnger ba la lamkhmat da ka Social & Economic Life District Committee (S&ELDC) ka la la ai shibun ki kam shakri na ka bynta jong ki paidbah jong katei ka jong ka thaiñ kiba hap hapoh ka Mawsynram C&RD Block, dang ha ki snem ba la dep ka la pyndep ar tylli ki programme kata kawei ka long, “shaphang ka ïoh kot bad ka ïoh kam ïoh jam, kaba ki paidbah bad ki khun samla ki la ïoh jingmyntoi shibun na kine ki programme ba la pynlong da ka SELD Committee.
Ha kane ka sngi la ïa don lang u Sordar jong ka Shnong Synnei, u bah Shembor Syiemlieh, u T.Bn. T.S. Buhroy, bah M.B. Niangmih uba dei u Secretary jong ka SELD Committee, ryngkat kiwei de ki rangbah jong ka shnong bad ki Tynmen Basan.