Ban ïarap ïa ki khynnah ba duna ha ka Physics thoh u Babu da kot “Physics The Magic Book”
Shillong, Nailur 13: Ka Hynñiewtrep Integrated Terrestrial Organization(HITO) ha ka sngi Ba-ar ka la pynkup burom ïa u Babu Risakmen Romor Jones Dkhar uba la lah ban pynmih ïa ka kot Physics kaba u la jer kyrteng ka Physics The Magic Book kaba la thoh na bynta ban pyndonkam ki khynnah pule Science class 12.
Haba kren sha ki nongthoh khubor u Babu Risakmenlang u la ong ba kane ka kot kaba u la thoh ka long kaba la biang pura ban pyndonkam na bynta ki khynnah klas 12 namar ka la kynthup lut ïa baroh ki lynnong jong ka syllabus kaba ka MBOSE bad CBSE ka kdew na bynta ka klas 12. U la ong ruh ba kane ka kot kaba u la thoh ka long kaba suk ban sngewthuh bad kan ïarap ruh ïa ki khynnah kiba ym ïoh lad ban leit tution namar la ai jingbatai kaba suk ban pei phang wat da ki khynnah ba kham duna ka jingproh jabieng ha ka subject physics.
U la ong ruh ba ka thong ba u thoh ïa kane ka kot ka long ban ïarap ïa ki khynnah kiba duna ka ïoh ka kot bad kiba ym ïoh lad ban leit tution namar u ong ba ka rukom thoh jong u, u thoh kum ka jinglah ne kaei kaba ki khynnah skul kin suk ban peiphang.
“Ha man ki lynnong la ai shuwa ki formula bad ki jingbatai nangta bud ki jingkylli ba don jubab ryngkat ki nuksa ba suk ban ïarap ïa ki khynnah ban sngewthuh shai” u la ong.
“Nga ïa lade ngam pat ju leit tution ha ka rta leit puile jong nga, naduh klas A rit haduh ka kyrdan master Degree nga pule hi beit bad nag ngeit kito ki bym ïoh lad ban leit tution lada kin pyndonkam da kane ka kot ki shemphang bad tbit kum kiba leit tution” u la ong.
“Kumba nga la ïohi ba ha ka por ba don ka khangdam kiba bun ki khynnah kiba duk bad kiba sah sha ki nongkyndong ki mad ka jingeh kaba khraw na ka daw ka jingbym don mobile phone bad ka jingbym biang ka network bad dei ha kata ka por ba nga sngewthuh ba ka donkam ba ngan pynmih ïa kane ka kot ban ïarap ïa kum kine ki khynnah pule” u la bynrap
U la ong ruh ba na ka liang jong u kum u nonghikai ba dang khynnah u la pyrshang ban pynmih ïa ka kot bad u la khot la wer ïa kiwei pat ki reiwshemphang kiba la kham san ka jingtip ba kin synnïang lem sha ka thoh ka tar na ki khuiñ jabvieng ka jaidbynriew.
“Ha kiwei ki jylla kum ha Kerela bad Tamil Naduh bad kiwei ki khynnah ki ïoh ban pule Physic, Chemistry, biology namar ki la kynrei ki nongthoh ba da kane hi ka nuksa nga kwah ba kito kiba la kham shemphang ka jingtip ban wan shakhmat ban synïang sha kane ka bynta” u la ong.
U Babu Risakmen Romor Jones Dkhar u dei ruh u nonghikai Physic ha ka klas 12 jong ka skul Sacred Heart Boys Higher Secondary School Mawlai.