Ban ïarap bad kyntiew ïa ka ïew ki nongrep, da ka rep ba khlem ai dawai yn pynkhlaiñ ka Sorkar

Shillong, Naitung, 12: Ka Sorkar Jylla nangne shakhmat kan ïaleh ban pynkhlaiñ ïa ka rep khlem ai dawai khnang ba kan long ka jingïarap ïa ki nongrep ban pynïaid ïew ïa ki mar rep ym tang hapoh ka jylla, hynrei shabar ka jylla bad wat shaduh ki ri jong ka pyrthei.
Ïa kane la ïathuh da ka Myntri ka tnad ka rep ka riang jong ka Sorkar Jylla ka Kong Ampareen Lyngdoh haba kren sha ki lad pathai khubor ha ka sngi Thohdieng ha New Delhi. Ka Kong Ampareen Lyngdoh ka la wan poi ha Nongbah Delhi ban sakhi dalade ïa ka tamasa sohtrun kaba la sdang naduh ka 10 tarik Naitung.
Kane ka tamasa sohtrun kaba san sngi lynter kaba la sdang naduh ka 10 tarik mynta u Naitung 2024 bad kaban pynkut ha ka 14 tarik, la pynïaid da ka tnad Horticulture jong ka Sorkar Jylla ha Dilli Haat, Ina New Delhi, kaba dei shi bynta ban ïarap bad ban nang kyntiew shuh shuh ïa ki nongrep hapoh ka Jylla.
“Khnang ba ki nongrep kin ym duh nong, na ka liang ka sorkar kan ïaleh ban pynduna ïa ka jingpyndonkam da ki dawai kaba pynduh nong ïa ka ïew jong ki nongrep ha ka National bad international market, hynrei ngin hikai ba kin leit rep tynrai khlem da ai dawai,” ka la ong.
Ka Kong Ampareen Lyngdoh ka la pynpaw ka jingsngewkmen ba kum ka tnad ka rep ka riang jong ka Jylla ka la ïoh biang ban pynpaw pyrthei ïa u sohtrun hapoh Nongbah New Delhi.
“Kane ka dei ka sien kaba ar kaba na ka sorkar ngi wanlam biang ïa ki nongrep ba kin pynpaw pyrthei ïa ki mar ki mata khamtam eh ban die ïa u sohtrun uba bang tam hapoh ri India. Kum ka Myntri jong ka rep ka riang nga da kmen palat ba sa shisien kane ka la urlong biang,” ong ka Kong Ampareen.
Ka Myntri ka la ïathuh ba ka sorkar ka la pynleit jingmut ban ïateh bad ki company kiba heh ban pynïaid ïew ïa u sohtrun. “Ka Sorkar ka pynleit jingmut ban ïoh ki company kiba lah ban pynrkhiang ïa u sohtrun ban shalan sha kiwei de kiba shna ïa u cake, biskit, icecream, ki jingbam khunlung bad kumta ter ter. Na ka por sha ka por ka sorkar ka la nang pynkiew ban ai jingïarap ïa ki nongrep,” ong ka Myntri.
Ka la pyntip ruh ba ka Sorkar kan mang tyngka ha manla ki District ban ïarap ïa ki nongrep haba ki ïakynduh ïa kino kino ki jingeh kum ha kaba pyut ki mar rep nalor kiwei kiwei.
Ha kane ka sngi, ka Myntri ka la ïakynduh ïa ki nongrep, ki nongseng kam seng jam bad ki nongkhaïi kiba die ïa ki marbam mar dih.