Amlarem, Rymphang 23: Ka District Legal Services Authority West Jaiñtia Hills District mynta ka sngi 23 tarik kala pynlong ïa ka prokram ai jinghikai halor ka jingïada naka jingshongkha khynnah ha ïing Amlarem WJHD.
Kane ka prokram ka long shi bynta naka ‘100 Days District-Wise Action Plan Prevention of Child Marriages in Meghalaya’, kaba hap hapoh ka NALSA (ASHA-Awareness, Prevention, Help and Action) SOP bad Bal Vivah Mukt Bharat Campaign.
La wan ban sakhi lang naduh u Ophisar-in-Charge ka Amlarem Police Station, u Assistant Commissioner, kiba wan mihkhmat na ka District Bar Office (DBO), ki dkhot jong ki Cluster Level Federation (CLF) hapoh ka Amlarem Civil Sub-Division, ki dkhot jong ki Self Help Women Group (SHG), ki nongïalam shnong bad na ka District Hub for Empowerment of Women.
La pynsngewthuh paidbah halor ki kyndon jong ka aiñ Prohibition of Child Marriage Act, 2006 bad ka Protection of Children from Sexual Offences (POCSO) Act, 2012. Da kaba pynsngew ka rta shongkha shongman ka long katkum ka aiñ 18 snem na ka bynta ki kynthei bad 21 snem na ka bynta ki shynrang. La pyntip kino kino ki briew kiba leh pyrshah ïa kyndon jong ka jingshongkha khynnah ki hap ban shah pynshitom da kaba set phatok bad shah daiñ kuna.
Kiba bun na ki nongkren kila pynpaw ba ka jingshongkha khynnah kam dei tang ba ka pynkheiñ ïa ka aiñ, hynrei ka don ruh ïa ki jingma ba khraw haka imlang sahlang bad haka koit ka khiah, kynthup ïa ka jingsangeh haka jingpule, ka jingkha khun kloi, ka jingduna haka liang ka ïoh ka kot bad ka jingkiew ka jingshah lehbeiñ. La kyntu ban don ka jingkitkhlieh kum ki kmie ki kpa na ka bynta ki khun bad ban don ka jingpeitngor bad ka jingïatreilang haka imlang sahlang ban ïada ïa ka hok jong ki khynnah.
Ha kane ka sngi la pyni ïa ka jinglehkai surok ba la shim bynta da ka NSS Unit jong ka Kiang Nangbah Government College.Nalor kata pynsngewthuh shaphang ka Pradhan Mantri Matru Vandana Yojana (PMMVY).Shaphang ka District Hub for Empowerment of Women ha ryngkat ka jingkyrshan na ka District Social Welfare Officer (DSWO) na ka bynta ban ïoh shibun ki jingmyntoi da kaba pynrung kyrteng hapoh kane ka skhim.La pynshai kiba don bynta ha ka jingshongkha khynnah ki lah ban shah weng na ki jingïoh myntoi naka sorkar.
La pynkut ïaka prokram da ka jingïashim bynta lang jong ki paidbah haka jingïaphylliew jingmut, khnang ban pynlong ïa ka District ban lait na ka jingïa shongkha khynnah.
