Ban ïada na ka jingpang TB da ka drama surok pynsngewthuh ka Urban PHC Loomkyrwiang

Jowai, Lber 25: Ka Urban PHC Loomkyrwiang (HWC) Jowai, ka la rakhe ïa ka ‘World Tuberculosis (TB) Day’, da kaba pynlong ïa ka ‘Street Play’ ha ka sngi Baar ha Ïawshyiap kaba don hajan ka H.K Sing Memorial School, Jowai.
Kane ka jingïalehkai surok ‘Street Play’ ka long shi bynta ban pynsngewthuh paidbah halor ki lad jingïada na ka jingpang TB, la rakhe ïa ka mynta u snem halor ka phang kaba ong “Yes!We can End TB”.
Ïa kane ka street play la pynïaid da ki nongtrei ASHA’s (Accredited Social Health Activist) kiba la pynlong ïa ka jingïalehkai shaphang ki dak ki shin jong kane ka jingpang, haka juh ka por ki la pyni halor ka jingdonkam ban dih dawa tista, khnang ba katei ka jingpang kan duh ka dam shi syndon.
Lyngba kane ka jingïalehkai ‘Street Play’ la ai jingtip sha ki paidbah halor kumno ban ïoh ruh ïa ka met kaba koit ba khiah naduh ki jingbam ba tei met bad ka jingdih ïa ki dawai.
Na ka liang ki nongtrei ka koit ka khiah ki la pynsngewthuh paidbah ïa ka jingpang TB lah ban pynkhoit kloi ïa ka, lada ki nongpang ki wan ban test haka por ba biang, shuh shuh ki la pyntip ïa ki dawai bad ki jingtest ïa kane ka jingpang na ka liang ka sorkar ka la pynbiang khlem donkam ban siew.