Nongpoh, Ïaiong 30: Ban shim ïa ka bynta na ka bynta ban pynneh pynsah ïa ka khlaw kur bad ha kajuh ak por ban ïada ïa ka mariang kaba dei na kajingpynjot pathar ha kine ki snig kiba mynta, ka Kur Khymdeit Nongtluh Mathan ha Ri Bhoi mynta ka sngi ka la pynlong syndon da ka jingthung dieng ha ka khlaw kur kaba don hapoh ka shnong Umkon ha Ri Bhoi District.
Ïa kane ka jingthung dieng ba la pynlong da ka Kur Khymdeit Nongtluh Mathan ha Ri Bhoi la ïalam da u Bah Donbok Khymdeit, uba dei u kñi ka Kur Khymdeit bad la don lang ruh da u nongaibuit ka kur Khymdeit, u bah Flying Khymdeit, u Bah Sterin Khymdeit kum u President ka kur, u Bah Strey Khymdeit, Secretary kur bad ryngkat kiwei kiwei ki dkhot jong ka kur Khymdeit ba hap ha ka Nongtluh Mathan ha Ri Bhoi.
Ha kane ka sngi, ka kur Khymdeit Nongtluh Mathan ka la lah ban thung ïa ki dieng ha ka khlaw kur kaba la kot sha ka 400 tynrai ki symbai dieng bad kum ka kur Khymdeit ka ai ruh ka jingkhublei kaba kyrpang ïa ka tnad Social Forestry ha Ri Bhoi kiba la kloi ban ai ïa kine ki symbai dieng b akum ka kur ka la lah ban thung kyrpang hapoh ka khlaw kyntang jong ka kur Khymdeit.
Haba kren ha kane ka sngi, u Bah Donbok Khymdeit, Kñi ka Kur Khymdeit, u la ong ba kane ka jingshim ka kur Khymdeit ha ka sienjam ban pynlong ïa ka jingthung dieng hapoh katei ka khlaw kyntang ka kur, ka dei ka jingangnud ka kur Khymdeit ban pynneh pynsah ïa ka khlaw kyntang jong ka kur kaba long ka jingmyntoi jong ki para ki pyrsa hadien habud.
U la ong ruh ba kum ka kur Khymdeit ka don ruh ka jingangnud ban pynlong ïa kane ka khlaw kum kata ka khlaw kyntang jong ka kur (Sacred Grove), ha kaba ha kine ki sngi la ñiar ban lap ba dang don ki khlaw kiba heh bad kiba rben hapoh ka jylla bad khlem pep lada ngi lah ban pynneh pynsah ïa ki dieng ki siej kiba don hapoh kane ka khlaw ngi lah ruh ban pynneh pynsah ïa ki mrad bapher bapher ha kaba ha kine ki sngi bun ki la duh jaid na ka daw ka jingpynjot pathar palat ïa ki khlaw ki btap.
Namarkata, u la bynrap ruh da kaba ong ba ka Kur Khymdeit kan dang ïai sumar sukher ïa kane ka khlaw bad kum ka Kur Khymdeit hi baroh kawei kin don lang ka jingïatrei lang na ka bynta ban pynneh pynsah ïa kane ka khlaw ba kyrpang jong ka kur, namar lada ngi lah shisha ban ïada ne pynneh pynsah ïa kane ka khlaw ka don ka jingkyrmen ïa ka kur bad khamtam ha kaba ïa dei bad ka jingpynneh pynsah ïa ki khlaw ki btap kiba long pat ka nuksa na ka bynta kiwei ba ki dei ban don ka mynsiem jong ka jingïatrei lang ban ïada ïa ka mei mariang, la bynrap u Bah Donbok Khymdeit, Kñi ka Kur Khymdeit na Nongthluh Mathan ha Ri Bhoi.
