Shillong, Jylliew, 05: Khnang ban ïada bad ban pynneh pynsah ïa ka tyllong um ha ka shnong Umshing-Umjapung Mawlai, ka Khasi Student’s Union (KSU) Mawlai Circle ha ka sngi Saitjaiñ ka la thung kumba 100 tylli ki tynrai dieng.
Kane ka umshyngiar ka dei ka tyllong um kaba kongsan bha bad kaba ju sam umbam umdih sha ki longing jong ka shnong Umshing-Umjapung Mawlai, Shillong, ka shnong kaba la nang roi ha ka jingdon jong ki nongshong shnong.
Khnang ban pynneh pynsah ïa kane ka tyllong um, ka Dorbar Shnong Umshing-Umjapung Mawlai ka la ïasoi da ka soskular ban aiti noh ïa kane ka jaka sha ka Ophis jong u Syiem ka Hima Mylliem bad pynkynriah ïa ki trai jaka kiba don jaka sawdong jong kane ka umshyngiar sha ka Khlaw Syiem kaba dang hap hapoh u pud u sam jong ka shnong Umshing-Umjapung Mawlai.
Ka jingthung jong ka seng ïa kine ki tynrai dieng ka long ruh kum shi bynta ban rakhe ïa ka World Environment Day ne ka sngi ban pynneh pynsah ïa ka mei mariang.
Ha kane ka sngi, ki dkhot jong ka Seng hapoh ka jingïalam jong u President u Samla Biangbor Paliar ki la hiar sa sha ka wah Lai Sdad kaba don harud jong ka surok Mawlai Bypass ban theh ïa ki symbai dohkha haduh lai hajar tylli.
Shwa kane, seng ka la pynlong ïa ka jingïalang kaba lyngkot ha ka shnong Mawkynroh-Umshing ha kaba la ïadonlang u Rangbah Shnong u Bah L. Nongkhlaw bad kiwei kiwei ki nongkitkam jong ka shnong.
Ka jingieid ïaka Mei Mariang kam dei tang haka sngi Rakhe ïaka World Environment Day, hynrei ka dei ban rung bad ban don ha dohnud bad haka jingim ka jong ngi kaba manla ka Sngi : KSU Mawlai Circle.
U Samla Biangbor Paliar haba kren ha kane ka jingïalang u la pynkynmaw kum ki khun bynriew ngi dei ban sumar khuid bad ïai pynjyrngam ïa ka mei mariang bad kumjuh ruh ngi dei ban kiar na kaba shna ïing hajan rud wah namar kane kan pynrit ïa ki wah bad kan ktah ruh ïa ki dohum dohwah kiba im ha ki wah
“Ngin hap long ki nuksa ïa kiwei ba ngin ym dusmon ïa ki sawdong sawkun jong ka mei mariang khnang ban pynneh pynsah kumba ka long bad lada ngi khura than kan long kylla ka jingtim ïaka pateng ka ban sa wan,” ula bynrap.
La synran lang ïa ki dkhot jong ka KSU Mawlai Circle da ka jingïashim bynta lang jong u Chairman ka Environment & Cultural Cell ka KSU Sengkmie u Samla Barikular Nongsiej bad ki dkhot jong kane ka kynhun.
Hadien kane, ki dkhot jong ka seng ki la pynkhuid ïa ki jaboh jabaiñ kiba la satah ha shilynter jong ka surok Mawlai Bypass ter ter naduh Mawlai Mawkynroh Umshing shaduh Mawlai Mawïongrim bad wah ruh ïaki jingthoh ki ban long kum ka jinghikai ïa ki paidbah ba kin kiar na kaba bret pathar ïaki jaboh ha kane ka surok khamtam ki ñiut kiba la song bha ha ki plastik kaba pynisaitmet ban peit haba ïaid lyngba kane ka surok bad kaba pyni lehraiñ haba ïohi ki nongjngoh kai pyrthei haba ki ïaid lyngba manla ka sngi.
Ka Seng ka khot bad wer ïa ki paidbah jong ka shnong Mawlai bad ïa ki paidbah na kylleng ba kin kiar na kaba pathar sharud shakiar ïa ki tiar kiba ladep pyndonkam.
