K a jingprong tuh jong ki mynder Bangladeshi na ka ri Bangladesh sha u pud u sam jong ka jylla Meghalaya lyngba ka khappud Indo-Bangladesh kam dei shuh ka mat ïakren kaba pynsngewkhia ïa ki shnong ki thaw tang mynta hynrei ka dei ka mat kaba la slem.
Lehse lah ban ong ba ka ka jingïohkem jong ki shipai BSF ïa ki mynder ri kiba jam beain sha u pud u sam jong ka ri India ka dang long shi pawa na kaba ki mynder ïoh rung tuh na ki jaka ba dang lait rynghang bad ki bym pat don ki jingker sainar.
Wat hapdeng ka jingpeitngor bad ka jingpahara jong ki shipai BSF ha khappud, hynrei ka jingïoh rung laitlan jong ki mynder ri shapoh ka jylla Meghalaya na ka khappud ka jur bha haduh katta katta. La ïohi ruh ba ki don lei lei sa ki Dalal trai jylla bad bar jylla kiba ju im kamai jakpoh beain ban pynrung tuh ïa ki mynder ri. Kaba pynsah umdum ïa ka tnat shipai BSF, ïa ki bor Pulit ka jylla bad ïa ki tnat syntiat khamtam haba ki mynder ri kiba ladep rung tuh sha ka jylla bad krih sha ki jylla ka ri India ki shah kem ynda haba ki la thmu ban leit phai biang sha la ka ri. Hato yn kynnoh ba kane ka dei ka jingtlot jong ki tnat syntiat ka Sorkar ne yn ong ba ka dei ka jinglait ryngkat ki katto katne ki bynta jong ka khappud bym pat lah ban ker sainar na ka daw ba ki dang don ha ka jingïapynbeit bad ka Sorkar Bangladesh.
U Symbud Myntri Rangbah ka Jylla uba khmih ïa ka tnat Kam Pohing u ju ïai kren ba sa 40 kilomitar eiei ka khappud jong ka jylla Meghalaya bad ka khappud jong ka ri Bangladesh ka dang lait rynghang. Kane ka dei ka jingma kaba ap ïa ka jylla Meghalaya, namarba ki mynder na ka ri Bangladesh kim salia ban leh ïa kino kino ki kam runar ruser wat ban dkhat ïa ka jingim briew tang ban ïoh lute.
Kiba bun ki jingjia ha kylleng ki khappud jong ki district ka jylla Meghalaya kiba ïatakhuh bad u pud u sam jong ka ri Bangladesh bad kane ka pyni ba ki mynder hi kin sah beit ki mynder bad kin ym salia ban leh ïa ki kam pyntriem pyrshah ïa kiwei pat ki jaidbynriew kumba paw ki sakhi sabut na ki jingshah pynïap ki trai jylla, ki jingshah thombor ha ki bri ki bsah.
Ka jingjia kaba dang shen ha ka taiew baladep ha ka shnong Rangdongai, ka shnong khappud kaba dang hap hapoh ka South West Khasi Hills District ka dei ban pynkyndit thiah bad ka Sorkar ka dei ban duh thiah duh dem ban ïada ïa ka jylla na ka jingshah thombor ha ki mynder ri na ka ri Bangladesh.
Ka jingpyntriem ki mynder ri ha ka shnong Rongdongai ban lute im im peit peit wat mynsngi mynshai bad ban rahbor wat ïa u samla nongshong shnong ka la pynsyier mynsiem ïa ki paidbah ha ki shnong khappud namarba ka kynhun ki runar mynder Bangladeshi kiba don 8-9 ngut ki pyndonnkam da ki suloi bad ki tiar pynbthei wat ban pynmynsaw ïa ki paidbah bad ïa ki bor Pulit bad BSF kiba kthong sha ki khlaw ki btap.
Ka jingbthah jong ka Sorkar Jylla ïa ki bor synshar District, ïa ki dorbar shnong, ïa ki Village Defence Party bad ïa ki paidbah ban ïada ka long kaba dei eh, hynrei ka jingrung laitlan jong ki briew kiba nabar ka jur bha haduh katta katta khamtam leilei dang shen haba ki dkhot ka KSU ka Laban Circle ki leit kyndang ïa ka iing jong uwei u Muslim uba la kynnoh ba u dei uba ju wanrah nongbylla nabar da ki Muslim ban ai jaka rieh pat ha Laban da kaba pynkam ba ki dei kiba wan kum ki nongjngohkai pyrthei.
Ka tnat Pulit bad ki tnat syntiat ki la dei ban kham pyrkhing ïa ka rung ka mih jong ki briew kiba nabar ha khyrdop talasi mynder ha kiba bun ki bynta jong ka jylla. Ka jingshah kyndang jong ki jaidbynriew suba Bangladeshi na ka jylla Assam kan ktah haduh katta katta ïa ka jylla Meghalaya namarba ki mynder kiba shah kyndang kin ym leit phai sha la ka jong ka ri, hynrei kin krih sha kiba bun ki bynta jong ka ri tang ban ïoh jaka rieh.
Ka kamram kam shong eh tang ha ki kynhun bapher bapher kiba ju kyndang bad khynra mynder na ka sngi sha ka sngi hynrei ka Sorkar hi ka ladei ban bud nuksa na ka jylla Assam ban kyndang naphang ïa ki poiwir kiba wan ha ka dur jong ki nongjngohkai pyrthei katba ka jingthmu ka long ban ïoh ïa ki dulir ban long nong India.
Ki jingjia ba ladep ba ka kynhun Pulit ka Meghalaya ka la lap ïa ka network pynrung tuh ïa ki mynder ri na ka ri Bangladesh ka dei ban long ka jingmaham lypa ïohba shisien ka sngi ïa ka jylla Meghalaya kan shah klun lut ki jaka ki puta ha ki nongwei shi sngi.
