Ban ïada ïa ka jingim ki longkmie ba armet bad khunlung, la rakhe ïa ka National Newborn Week

Khliehriat, Naiwieng, 19: Ïa ka taïew ba kyrpang ba la tip kum ka National Newborn Week 2024 la pynlong ha Khliehriat Civil Hospital, East Jaiñtia Hills District halor ka phang pdeng “Optimising Antimicrobial Use to Prevent Antimicrobial Resistance (AMR) in Newborns”, ba la pynlong da ka ophis District Medical &Health Officer, East Jaiñtia Hills District kum shi bynta ban pynsngewthuh kumno ban ïada ïa ka jingim jong ki longkmie kiba armet bad ki khunlung ba dang shu kha.
U District Medical &Health Officer Dr D. Shylla haba kren ha ka jingïalang u la kren halor ka jingdonkam ka jingshim khia lang kiwei kiwei ki tnat ruh kynthup lang ruh ki nongtrei ka tnat ka koit ka khiah, kum ki ASHA bad baroh ki paidbah ban ïada ïa ki khunlung na ka jingshah ktah ha ki khñiang jingpang, namar da ka jing shim khia lang yn lah ban tehlakam ïa ka jingïap ki khunlung kiba dang kha.
U Dr. Shylla u la kren halor ka jingdonkam ki jingbam tei met, ka jingkhuid jingsuba bad ka jingshim khia ki longkmie ban ïoh ïa ka koit ka khiah ha ka por ba ar met ban long kiba koit ba khiah.
U Medical &Health Officer (Paediatrician), Khliehriat Civil Hospital, Dr Henry RM Lamare u la batai bniah halor ka phang pdeng kaba ïadei bad ka taïew ba kyrpang ka“Optimising Antimicrobial Use to Prevent Antimicrobial Resistance (AMR) in Newborns” kata ban kyrmen ban lah ban shim ïa ki jingïada ban lait na ki jingpang ha ki khunlung ba dang kha, u la kren ruh halor kiba bun jait ki jait jingpang kiba ïabit ha ki khunlung kiba dang hapoh ka jingri jingsumar ka kmie, u kpa, kiba donkam ban sumar khlem ka jingdonkam than ban kynduh ïa ki nongsumar.
U Dr. Lamare u la ong ruh ba ka long kaba donkam ba ki longkmie ba armet bad ruh ki khunlung ba dang kha ba kin don ka jingkoit jingkhiah bad ruh ba ki ASHA kin pynsaphriang ïa ka jingtip sha ki shnong ki thaw bad ruh ban kyntu ïa ki paidbah ban shim ïa ki synjam ban long kiba koit ba khiah bad ruh ban buddien ïa kito ki longkmie kiba ar met khnang ban ïada ïa ka jingim jong ki longkmie bad ar met bad ïa ki khunlung ba ki dang pun.
Ha kane ka sngi, ki ASHA ba la lam khmat da ka CHO, Khliehriat MCH, ka kong R. Dkhar ki la pyni nuksa ïa ka rukom ban sait ïa ki kti ban lait na ki khñiang jingpang.
Kiwei pat kiba la ai jingkren ki kynthup ruh ka District Immunization Officer, East Jaiñtia Hills District, ka Dr (Mrs) N. P. Suchiang, u DPM, NHM, East Jaiñtia Hills District, u bah A. Dhar bad ka PHN, East Jaiñtia Hills District, ka kong Pinky Lawait.