Ban dawa pynduh noh ïa ka personal interview, shong kyllaiñ myngor ka KHNAM ha madan Malki

Shillong, Nailar 19: Ka Khun Hynñiewtrep National Awakening Movement (KHNAM) ha ka sngi Nyngkong ka la shong kyllaiñ myngor ha madan Malki ban pynbor ïa ka Sorkar Jylla ba kan pynduh noh ïa ka personal interview ha ka thungkam sorkar jong ka Group-B, C bad D.
La iohi ba ki Nongïalam bad nongkitkam ka KHNAM ki la sdang ïa kane ka jingshong kyllaiñ myngor naduh ka por 10 baje mynstep bad pynkut ïa ka ha ka por 5 baje janmied ha kane ka sngi.
Haba ïadei bad kane haba kren sha ki lad pathai khubor, u Working President ka KHNAM u Bah Thomas Passah ula ong, “Kumba ngi la pynbna ba kane ka jingïakhih kadei ban dawa na ka Sorkar Jylla ban pynduh noh ïa ka Personal Interview ha ki kam Sorkar Grade B, C, D bad kumta ka seng ka la leh ïa kane”.
Shuh shuh u Bah Thomas ula kam ba ka jingpynduh ïa ka Personal Interview kan pynthikna ba ka thungkam thungjam hapoh ka Jylla kan long kaba khuid ba suba khlem kano kano ka jingleh shilliang ne jied bahaïing ne ki briew kiba don jingïadei bad ki heh ki haiñ ha ki kam sorkar.
U Bah Thomas ula ong ba kane kam dei shuh ka sien ba nyngkong ba ka KHNAM ka ïakhih ban pynduh ïa ka Personal Interview hynrei na ka liang ka Sorkar Jylla kam shym la sngap bad kane ka pyni ba ka Sorkar ka lah ban donkti ban thungkam tang ïa kiba mon bad ba ka seng ka la dawa na ka sorkar mynta lah jan shisnem eiei.
“Naduh ka Sorkar MDA, ka KHNAM ka la thoh bun tylli ki dorkhas ban dawa pynduh noh ïa ka Personal Interview hynrei haduh mynta ka Sorkar Jylla kam pat shim ïa kano kano la rai halor kane ka jingdawa jong ngi,” bynrap u Bah Passah.