Ban dawa kyntiew noh ïa ka Mawsynram C&RD Block sha ka Civil Sub-Division

Mawsynram, Ïaïong, 16: Hadien ba ka na ka liang jong ka sorkar Jylla kam shem la sngap ïa ki jingdawa jong ka Kynhun ki Seng-bhalang ha ryngkat ki paidbah ka Mawsynram C&RD Block ban kyntiew noh ïa kane ka Community & Rural Development (C&RD) Block sha ka Civil Sub-Division, ha kine ki khyndiat sngi kane ka kynhun ka la mih paidbah da kaba sam syndon da ki kot lyngkdop sha ki paidbah.
Kumta ka kynhun ki Sengbhalang jong ka Mawsynram C&RD Block ka la ïoh ban bteng biang ïa ka jingïakhih kum ka dak jong ka jingpynkynmaw ïa ka sorkar halor ka jingdawa kyntiew kyrdan ïa ka Mawsynram C&RD Block sha ka Civil Sub Division bad halor kane ka lah ïoh ban sam ïa ki kot lyngkdop sha ki paidbah ka thaiñ Mawsynram kum shibynta ban pynshai paidbah ïa ka jingdonkam kyrkieh kaba long shibynta ban wanrah bad kyntiew ïa ka roi ka par hakane ka thaiñ.
Lah ban kdew ruh ba ka Mawsyram C&RD Block Mawsyram ka dei kawei kaba la rim tam ha ka jylla Meghalaya ba ka la ïoh naduh ba ka dang shynshar ka sorkar Assam ha u snem 1962.
Namarkata, ki kynhun seng bhalang nangne shakhmat ka nangïaid shaphrang ban pynshai ïa ki paidbah halor kane ka bynta haduh ba kin da ïoh ïa ka kaei ba ki kwah namar kim sngewhun ba shu sngap kumne na ka bynta ki mat jingdawa jong ki.
Haba kren ha ki lad pathai khubor, u Kyllang S. Thongni, President jong ka HANM u la ong ba kum ka dak jong ka jingpynkynmaw biang ïa ka sorkar Meghalaya kaba ïa dei bad ka mat jingdawa ban kyntiew noh ïa ka Mawsyn-ram Community & Rural Development (C&RD) Block sha ka Civil Sub Division, na ka liang ka kynhun ki Seng-bhalang kiba don hapoh jong ka Mawsynram Block ba kynthup naduh ka HANM, HYC, FKJGP, HUAM, KSU bad kiwei kiwei de ki la mih paidbah biang biang da kaba ki sam lyngba ki kot lyngkdop kaba long kawei ka synjam ïa kaba ki la ïoh ban pynkynmaw biang sa shisien bad ruh kum ka dak jong ka jingïakhih ba jai jai.
U la kynmaw ruh ba kum ka kynhun ki Sengbhalang ka la ïoh ban ïa kynduh ïa u Myntri Rangbah jong ka Jylla Meghalaya, u Conrad K. Sangma ha une u snem 2021 hynrei kum ki nongïalam ki la pynpaw ka jingsngewdiaw ba haduh mynta kim shym la ïohi kano kano ka dak ne jingkular (signal) na ka liang jong ka sorkar ban pynurlong ïa kata ka jingdawa.
Namarkata, kum ki nong-ïalam kim shym la shongkli-kti ne shongthait hynrei nangne shakhmat kin sa shim da kiwei pat ki synjam ne ki jingïakhih ban pynkhlaiñ ïa ka jingdawa khnang ba kin lah ban pynurlong ïa ka jingthmu na ka bynta ka jingdonkam jong u paidbah ka dong ka thaiñ.
Katba na ka liang u Kyrmen Shangdiar u la ong ba na ka liang ki sengbhalang bapher bapher kiba hapoh jong ka Mawsynram Block kim shym la sngewhun ban ïoh ban leit ïa kynduh ïa u Chief Minister jong ka Jylla Meghalaya ne wat ïa u Myntri ba dei peit ïa ki C&RD Department, hynrei na ka liang ka seng ki hap ban kyrsiew thiah biang sa shisien ba ka sorkar kan kynmaw ïa kaei ba kum ki nongïalam jong ki sengbhalang ki la dep ban ai jingthoh ne dep ïa kren shakhmat bad kumba ki ki la kular.
U la pynkynmaw ruh ba kane ka Mawsynram Community & Rural Development (C&RD) ka dei kawei na ki C&RD kiba la rim tam bad kaba la donkam mynta ban kyntiew noh sha ka Civil Sub Division. Namarkata, u la ong ba ha kine ki sngi ki ban sa wan kum ki nongïalam kin sa ïoh ban leit sha ki shnong ki thaw jong ka dong ka thaiñ Mawsynram ba kin pyn-sngew ha ki paidbah halor kane ka jingdawa jong ki namar kim sngewhun ba shu kut tang ban ïoh ban sam ïa ki kot lyngkdop.
Ha kane ka sngi ïa ki nongïalam ba hakhmat jong ka kynhun ki Sengbhalang la synrang lang ruh da ki dkhot jong ki sengbhalang bapher bapher kiba hapoh jong ka Mawsynram Block.