Ban ai noh ïa ki jaka shipai sha ka Municipal, yn kynduh u Conrad ïa u Defence Minister

Shillong, Naitung 03 : U Myntri Rangbah ka Jylla, Conrad K Sangma u la pynkhreh mynta ban kynduh ïa u Myntri ka tnad Ïada Ri ka Ri, u Rajnath Singh na ka bynta ban ai noh ïa ki jaka jong ki shipai ba don ha Shillong sha ka Shillong Municipal Board.
“Nga la pyntip ba nga kwah ban kynduh ïa u Myntri ka tnad Ïada Ri ka Ri haba ïadei bad katei ka jaka Cantonment Board kaba la tyrwa ban aiti noh sha ka Municipal Board kaba dei ka jaka paidbah,” ong u Myntri Rangbah haba kren bad ki lad pathai khubor ha shwa ba un leit sha Delhi.
U Myntri Rangbah u la ïathuh ruh ba ha katei ka jingleit jong u sha Delhi un pyrshang ruh ban kynduh ïa u Myntri ka tnad Pule Puthi ka Sorkar Pdeng ban ïakren halor ka ishu kaba ïadei bad ka Common University Entrance Test (CUET).
“Ngin sa ïa kren ïa ka CUET bad kumno ban lap ïa ka lad khnang ba kan ïarap wat ha ka por ban sa wan ruh da kaba buh kham bun ki centre ha ka jylla bad ruh ban don ïa ki eksam kiba ki samla kim lah ban leit ïakhun kumba ka jia dang shen,” u la ong.
Haba ïadei pat bad ka jingkyrduh bording ha ka jylla, u Myntri Rangbah u la ong ba un sa kynduh ïa u Chairman ka NTPC ban ïa kren halor ki katto katne ki power plant ha ka jylla.
“Ngan sa kynduh ruh ïa ki ophisar jong ka International Solar Mission bad ngan sa leit mih sha ophis jong ki bad kane ruh kadei shi bynta bad ka CM Solar Mission. Ngi kwah ban ohi kumno ngi lah ban treilang bad kumno ki lah ban kyrshan ïa ka Mission jongngi khamtam haba ïadei bad ka Solar Energy,” u la ong.