Ban ai jingshakri ba kham bha ïa ki samla pule, pyllait paidbah ka SSCM ïa ki ar tylli ki bos

Mawkyrwat, ‘Naitung 11: Ka Sngap Syiem College, Mawkyrwat lyngba ka Transports Cell mynta ka sngi ka la ïoh ban pyllait paidbah ïa ki ar tylli ki bos, ki ban long ki kali ban ai jingshakri da kaba kit na ka bynta ki samla pule kiba wan pule hapoh ka Sngap Syiem College, Mawkyrwat.
Lah ban kdew ba ïa kine ki ar tylli ki kali, ka Sngap Syiem College, Mawkyrwat lyngba ka Transports Cell ki la ïoh ban thied bad pynbha hi ha ka jinglut jong ka kolej. Kine ki kali kin kit ïa ki samla pule kiba don ha ki shnong kiba kham pajih na kane ka skul pule kata kawei ka bos kan ïaid na Wahsiej – Mawthawpdah bad poi sha Shngimawleiñ katba kawei pat kan ïaid na Rangmaw – Jakrem ter ter ha ki shnong kiba khamjan. Ki ar tylli ki kali ki dei kiba don ïa u Registration Number; ‘ML 01 7370 bad ML 01 7364’.
Ha ka jingïalang ba lyngkot, u bah Renikton Lyngdoh Tongkhar u MLA ka Mawkyrwat Constituency ha ka jingkren jong u, u la ai ka jingïaroh ïa ka jinglah jong ki nongpynïaid jong ka Sngap Syiem College, Mawkyrwat ha kaba ki lad jingshakri jong ki, kim shym la kut tang hapoh ki kamra klas hynrei mynta pat ki la mih shabar jong ka ban ai jingshakri na ka bynta ki samla pule jong ka dong ka thaiñ Mawkyrwat baroh kawei, namar lyngba ka jingïoh ban pyllait paidbah ïa ki ar tylli ki bos kan sa long ka jingkyrkhu bad ban pynpoi ïa ki samla pule hapoh ka kolej ha ka por ka biang. U don ruh ka jingkyrmen ba lyngba kane, kum ka kolej kan nang lah ban pyiar ïa ki tnad jong ka jingai jingshakri ïa ka dong ka thaiñ bad ka distrik baroh kawei khamtam eh ïa kito ki longïing kiba duna ha ka ïoh ka kot.

U bah Carnes Sohshang, u MDC jong ka Mawkyrwat Constituency pat u la ong ba kane ka sngi ka dei ka sngi jong ka jingjop jong ka kolej baroh kawei namar ki don ha ki ïa ka jingïatreilang kumno ban pyrkhat bad pynïoh ha ki samla pule ïa ki ar tylli ki bos khnang ba kan pynsuk ïa ki ha ka leit ka wan kaba manla ka sngi. U bah Carness u la pynkynmaw ruh ba kane ka sngi ka dei ruh ka jingurlong hadien ka jingwan jngoh jong u Chief Secretary, ïa kaba ma u u la kular ban pynïoh ha kane ka kolej ïa ki College Bus.
Ha ka jingkren jong u Dr. K.K. Nongsiej, Principal jong ka Sngap Syiem College, Mawkyrwat u la ïathuh ïa ka jingïaid lynti jong ka kolej ha kaba ka la kynjoh mynta ïa ka 38 tylli ki snem bad ha ka jingpyrshang jong ka Governing Body ban pynbit pynbiang ïa ki jingdonkam jong kane ka skul pule lyngba ka jingai ha ki samla pule ïa ki bynta ba donkam kiba ïa dei bad ki lad jinghikai kiba har rukom ba ki samla pule kin ïoh lad ban ïa shimbynta.
Kiba la ïadonlang ha kane ka sngi ki long naduh ki nonghikai jong ka Sngap Syiem College, Mawkyrwat, ki kmie ki kpa bad kiwei de ki ‘riew rangbah.
Ïa ka jingïalang ka pynïaid da u Dr. K.D. Ramsiej, President jong ka Governing Body, Sngap Syiem College, Mawkyrwat bad ka jingdwai na u Rev. (Dr) S.I. Iawphniaw.