Nongpoh, Lber 11: Tang na ka daw ka jingthang khlaw uwei u rangbah ba u thmu ban rep ban riang ha kawei ka khlaw ha ka Shnong Mawphrow ha Ri Bhoi bad ka la long pat ka jingduhnong kaba khraw ïa kawei ka longïing kaba rep Sohtrun ba katei ka jaka rep Sotrun ka la shah bamduh ha ka ding haduh ba la sniew lut ki sohtrun bad kiwei kiwei ki jingthung jingtep.
Kane ka la jia ha ka shnong Mawphrow ha Ri Bhoi District, ha kaba kawei ka longïing ba la long trai da ka Kong Meris Makhroh ka la hap ban duh da ki lak tyngka, kaba dei na ka jingshah ktah jong ka jingpluh ding kaba la put sha ka jaka rep Sohtrun jong ka.
Ka jaka rep sohtrun ka la kylla dpei bad u sohtrun ba la rep ruh u la ingkhong lut na ka jingpur ka ding ba shyrkhei ha kana ka aion tyrkhong bad jan baroh shi lum ba la rep Sohtrun ka ding ka la pur ba ka la pynjot ym tang ïa u Sohtrun bad kiwei kiwei dei ki jngthung jingtep jong katei ka Longïing.
Ka Meris Makhroh, kum ka trai jong katei ka jaka rep Sohtrun, ka la ïathuh ba ha kane ka jingpur ka ding sha ka jaka rep Sohtrun ka la hap ban mad ïa ka jingduhnong kaba khraw bad ym duna shuh ïa ka 5 lak tyngka ba la pynjulor da ka ding ïa katei ka kper sohtrun.
Ka la ïathuh ruh ba kane ka jingpur ding sha ka jaka rep Sohtrun kam dei shuh ka sien kaba nyngkong bad ka la dei ka sien ka baar ba ki hap ban mad ïa ka jingduhnong tang na ka daw ka jingthang klumar ïa ki khlaw.
Kum ka longïing ba la shah ktah ha kane ka jingjia, ka la pynpaw ruh na tang na ka daw jong ka jingbym phikir kiwei pat ha kaba thang khlaw, ka la long ka jingduh nong kaba khraw na kane ka jingjia, ha kaba ka la pynpaw ruh ïa ka jingsngewsih kaba jur, namar ba ka dei ka snem ba kan ïoh sa tang ban kheit ïa ki soh ki pai kaba la long kumba iuh tdong bsein kyndit kynsan ka wan bam duh ka ding ïa ki jingthung jingtep jong ka, ka la bynrap.
