Nongpoh, Naiwieng 26 : Kawei ka longiing haka shnong Nongjri, Ri-Bhoi District kaba dei ka iing jong u Bah Cobin Mawlong bad ka kong Iantibha Lamare kila hap ban mad ïaka jingjia ba sngewsih hadien ba ka ding kala klang bad bamduh ïa baroh ki jingdon jingem haduh ban da kylla dpei lut.
Kane ka jingjia kala jia hynnin ka miet haka por kumba 11:30 baje eiei ha kaba la suba ruh ka jingkem ding jong katei ka iing ka dei na ka jingthud jong ka solar kaba ki pyndonkam namar katei ka longiing kam don bording ilektrik satia.
Hadien ba ka ding kala sdang ban klang ha katei ka iing, ki paidbah marjan kiba la iohi bad iohsngew ïa katei ka jingjia kila pyrshang ban ïarap bad mareh bran bran sha katei ka jaka ban pynlip ïa katei ka ding hynrei namar ka jingklang jong ki thylliej ding ki paidbah kim lah shuh ban leh eiei wat hadien ka jingpyrshang jong ki ban ïarap pynlip ïaka ding.
La ioh jingtip ruh ba ki pulit pynlip ding na Umiam kila pyrshang ban beh sha katei ka jaka hynrei namar ka jingslem jong ki ban poi kala pynlong ïaka ding ban bam shngiam ïa katei ka iing bad baroh ki jingdon jingem.
Shuh shuh ha katei ka jingjia ym shym don mano mano ba mynsaw, lait noh tang ka jingduh noh ïaki tiar ki tar bad ki jingdon jingem baroh.
