Nongpoh, Jylliew, 15: Ha ka sienjam kaba nyngkong, ka Mahatma Gandhi University kan sa phai khmat ban ai ka jingshakri kiba paka ruh na ka nynta ka koit ka khiah ki paidbah ba ka la jam sha ka sienjam kaba nyngkong ban pynbam smai ïa ki Nurse kiba pule ïa ka General Nursing and Midwifery (GNM) bad Auxiliary Nurse Midwifery (ANM) kaba dei ka kynhun kaba nyngkong jong ki Nurse kiba pule ha kane ka skulbah lyngba ka Mahatma Gandhi Institute of Nursing ba la plie paidbah ha katei ka skulbah.
Ïa kine ki Nurse ba wan pule ha ka General Nursing and Midwifery (GNM) bad Auxiliary Nurse Midwifery (ANM) la leh burom ha ka sngi Saitjaiñ da kaba thang ïa ki sharak bad ruh ban shim ïa ka jingsmai shwa ba kin pyntbit ha ki jingpule halor ki kam Nurse lyngba katei ka skulbah.
Ha kane ka sngi, ba la leh burom ïa kitei ki samla kiba thmu ban wan pule Nurse ha katei ka skulbah, la kynmaw burom ruh ïa ka Florence Nightingale, kaba dei kawei na ka riew kynthei kaba long ka nongai mynsiem ïa ki Nurse ba kin shim ïa kata ka jingkitkhlieh kum ki nongsumar pang bad kaba dei ruh ka Nurse kaba la lam lynti ban aiti ïa la ka jingim na ka bynta ban sumar ïa kiba pang ba shitom.
U Medan Balibert Langbrang, u Deputy Nursing Superintendent ka ARHI Hospital Jorabat u la shim bynta kum u kongsan bad ka Kong Itees Muktieh, ka Nursing Supervisor ka PHC Byrnihat kum ka symbut kongsan ha ka jingdonlang u Vice Chancellor katei ka skulbah, u Dr. Sagar O. Manjare, u Registrar ka Dr. Sarika Dixit bad u Dean ka Health Science, u Dr. Y.K. Reddy, uba la pynïaid ruh ïa kane ka prokram leh burom ïa ki Nurse ryngkat ka jingdon lang kitei ki Nurse ba wan pule ha katei ka skulbah.
Ha kane ka sngi na ka liang u Medan Balibert Langbrang bad ka Kong Itees Muktieh ruh ki la pashad ïa ki symboh pyrkhat sha kitei ki samla ba wan pule Nurse ha katei ka skulbah bad pynpaw ruh halor ka jingïaid lynti jong ka jingshakri ba ki la aiti ïa la ka jingim ban sumar na ka bynta kiba pang ba shitom. Kane ka jingphla mynsiem jongki ha khmat kitei ki Nurse ba wan pule ha katei ka skulbah, ka la long ka jingai mynsiem ïa ki ba kin pyndep ïa ka jingpule Nurse bad ban don ruh kata ka mynsiem ban shakri na ka bynta kiba pang ba shitom.
