Shillong, K’Lyngkot 10: Ka Justice Revati Prashant Mohite Dere, mynta ka sngi kala bam smai kum ka Chief Justice ba 15 jong ka Meghalaya High Court ïa kaba la long ha Lok Bhavan, Shillong.
La pynbam smai ïa ka Chief Justice da u Lat ka jylla u Chandrashekhar H. Vijayashankar ha Darbar Hall jong ka Lok Bhavan.
Ha kane ka jingbam smai la wan ban ïadonlang da ki riew pawkhmat, kum u Bah Sniawbhalang Dhar uba dei u Symbud Myntri Rangbah ka jylla, u Bah Lahkmen Rymbui uba dei u Myntri Sorkar, Ka DGP jong ka jylla ka kong Idashisha Nongrang, ka Deputy Commissioner EKHD, ki Dkhot jong ka High Court, ki dkhot ba rangbah jong ka Bar, ki heh sorkar, bad kiwei kiwei ki nongshah khot sngewbha nalor kiwei pat.
Ka Justice Revati Prashant Mohite ka la wan noh ha ka jaka jong u nongbishar Soumen Sen bad ka la pynpaw ïa ka jingsngewnguh kaba khraw ïa ka burom ba la ai bad ka la kular ban pynneh ïa ka Riti Synshar, ban pynpoi ïa ka hok khlem shah liang, bad ban trei ban pynskhem ïa ka jingshaniah jong ki paidbah ha ka tnad bishar.
