Nongstoiñ, Ïaïong, 28: Ka sngi balang jong kane ka taïew ka dei ka sngi ban sah jingkynmaw ha ka history jong ka General Nursing and Midwifery (GNM) Students of GNM School of Nursing, Nongstoiñ kaba dei ruh ka skul pule nos kaba nyngkong tam ha ka jylla, ha kaba ar phew ngut ki samla kiba la wan ban shah pyntbit ki la pyndep ïa ka jingpule jong ki bad la dep pynsmai ïa ki shuwa ba kin leit sha ki jaka trei ba ka sorkar kan sa phah ïa ki ha ki jaka bapher bapher hapoh ka jylla bad ka District na ka bynta ban ai ka jingshakri ïa ki paitbah.
Kum ka dak jong ka jingpynsmai la thang ïa ki mombati ha kaba u Doctor Z Marak MS Civil Hospital, Nongstoin, kong B Thabah Registrar Megalaya Nursing Council, kong V Syiemlieh Retired Assistant Director National awardee kong DH Lymba, Principal GNM School Of Nursing (GNMSON), kong S Pala Vice Principal GNMSON, Tutors kong I Dohtdong bad kiwei kiwei.
U Doctor Z Marak haba ai jingkren u la ong ba ka ka jingthang ïa ki mombati, ka long kum ka nuksa ba kitei ki samla kiba la pyntbit na ka bynta ban shakri ïa ki paitbah, kin shim ïa ka jingkitkhlieh ym tang na ka bynta ban ai ka jingkoit jingkhiah, hynrei ba in long kum ka jingshai na ka bynta jong uwei pa uwei u nongshong shnong bad ha baroh ki liang khamtam ha ka jingim ba man la ka sngi.
U la kyntu ruh ïa ki ba kim dei ban kmen tang namar ba ki lah ban ai ka jingkoit jingkhiah ïa ki nongpang, hynrei ba kin pynpynkhiah ruh ïa ki mynsiem bad ki jingmut jingpyrkhat jong kito kiba donkam. U la pynkynmaw ruh ba kim dei ban pynsyrwa kai ïa ka por ka jong ki, hynrei ba kin pynleit jingmut ha kaei kaba ki la dep pule ha ka jaka pyntbit bad ki dei ruh ban long kiba smat ba sting bad kin kiar na ki jingmlien ban shong jaituh, hynrei namar shisien ba la kyrni ka jingjaituh ka pyntlot ïa ka jabieng bad ka jingmut jingpyrkhat. U la pynkynmaw ruh ba ka ktien ki riew stad ka ong “Ka jabieng ba jaituh ka dei ka shlem jong u bymman”.
Ha kane ka sngi la ïoh ruh ïa ka jingkren khublei bad ai mynsiem ïa kitei ki samla da u bah K Rynjah, M Warshong, Kong D H Lymba, Kong V Syiemlieh, Kong B Thabah bad ka kong Anidha Ch Marak 1st year GNM student ka la ai ïa ka jingkren khublei.
