Nongstoiñ, Ïaïong 15: ka thylliej ding ba shyrkhei ka la bam duh ia ka iing jong I Piyoris Tynhiang na ka shnong Mawdongkiang ha ka thaiñ Mawshynrut, kat haduh ba ki jingdon jingem ki la ing lut khait. La ong ba ki la duh noh ia u kba 10 byrni, ki ksiar u sying bad baroh ki tiar bam, ki kot kum ka passbook, epic, ki dulir khyndew.
Kane ka jingjia ka la jia ha ka shiteng synnia jong ka 13 tarik mynta u bnai. La ong ba katei ka ïing ka don iwei I khun kynthei I ba kyrteng Mebadashisha Tynhiang I ba dang 16 snem karta I ba leit skul ha Umsohpiang. Hynrei, la ong ba namar ka jingjur jong ka lyer ym lah shuh ban lum wat tang iwei I tiar ruh. La ong ruh ba lyngba ka jingiarap jong I bah Kreming I ba sah Marjan, ki la lait na ki jingmynsaw.
Na ka liang ka Mawshynrut Coal Labour and Transport Association hapoh ka jingialam u President Personal Marthong bad Ssecretary Shanbil Wanniang bad katto katne ngut ki dkhot, hynnin dang step ki la ioh ban leit jngoh da la ki khmat bad ai jingiarap khyndiat ïa kine kiba shem lanot kum ki tin, u khaw, ki jhur. Ka seng MCL&TA ka buh ka jingkyrpad ba lada don kino kino ki sengbhalang kiba don ka mynsiew ban ïarap ba kin leit ai jingiarap.
