Nongstoiñ, Jymmang, 8: Hynnin ka miet ha ka por 12.30 baje ei ei, ka ding kaba klang ka la bam duh ïa ki khat lai tylli ki dukan kiba la shna da ka Lyngngam Nongtrai Multipurpose Coperative Society bad ba la shong wai da ki briew kiba na kylleng ki shnong kiba hapoh ka Mawshynrut Block.
Kitei ki dukan ki dei kiba la shong wai da ka Kong Baïahunlang Marweiñ na Mawthengkut, Kong Rishai Lyngkhoi Pormawthaw, Kong Piolinda Langrin na Janepieh, Kong Abajop Shangpliang na Janepih, Kong Kerry Diengngan na Nongryngkew, Bah Arquis B.Rynñiaw na Riangdo, Kong Lidia Diengngan na Lumpyngngad, Kong Dwianlina Khardewsaw na Pormawthaw, ka Ophis Society Kong Klency Wanñiang na Riangdo, bah Khos Paliar na Janepih, Kong Rebecca Dkhar na Riangdo, Kong Lida Mery Rynñiaw na Nongryngkew bad dukan kong Lakyntiew Synshiang na Riangdo. La antad ïa ka jingjulor ba ka la kot sha ka 25 lak tyngka.
U Bah Sping Mawlieh Finance Secretary ka Society haba ïa kren bad u nongthoh khubor, u la ong ba ha katei ka por ba ka ding ka la sdang ban klang, na ka liang ki paitbah bad ki Volunteer jong ka shnong Riangdo, ki la ïaleh katba lah ban tem ïa ka thylliej ding hynrei kim lah leh ei ei.
Ki pulit pynlip ding ruh ki la pynsted katba lah ban pynlip noh ïa ka ding, hynrei wat la katta ruh ka jingjulor ka la long kaba jur bha. ïa ka daw jong ka jingpluh ym lah satia ban tip thikna, hynrei la suba ba ka lah ban dei na ka daw ka jingthut ha ka bording elektrik.
