Balei tang ka UDP kiwei ki Seng Saiñ Pyrthei kim pat ai jingmut halor ka Reservation Policy : Sawkmie

Shillong, Nailar 1 : U Co Chairman ka State Development Reforms Commission uba dei ruh u MLA ba rim ka Mawlai u bah Process T Sawkmie u la buh ka jingkylli balei kat haduh mynta mynne dang tang ka UDP kaba la phah ïa ki jingai jingmut sha ka sorkar halor ka Reservation Policy (RP) katba kiwei ki seng ki Seng Saiñ Pyrthei ki dang sngap jar jar nalor ba kane ka kam ka long kaba hap ban ïa shim jingkit khlieh lang da baroh lada kwah ban wanrah ka jingpynkylla.
Haba kren sha ki lad pathai khubor u bah Sawkmie u la ong ruh ba ka sorkar ka la dei ban pynbna noh ïa ki kyrteng jong ki dkhot ka Expert Committee kaba dei ka Committee ka ban shong bishar bniah halor ki jingai jingmut jong ki seng saiñ pyrthei bapher bapher.
U la ong lada ki seng saiñ pyrthei ki shim khia ïa kane ka kam ki la dei ban phah kloi ïa ki jingai jingmut jongphi namar kam myntoi ban shu ïakren shane shatai ne ban shu ïa khnium na kyndong kyndong namar haba ka sorkar pat ka pan jingmut ym don ba kloi ban phah. U bah Sawkmie u la ong na ka liang ka sorkar ka la kyntu ïa baroh ki seng saiñ pyrthei hapoh ka jylla ba ki dei ban phah kloi ïa ki jingai jingmut jongki khnang ba ka Expert Committee kan ïoh ban shong noh bad bishar ïa kiei ki jingai jingmut bad kiei ki jingkwah jongki.
Kumba ka paw hi kat haduh mynta tang ka UDP kaba shim khia ïa kane ka kam namar dang tang kane ka seng saiñ pyrthei kaba la phah ïa ki jingai jingmut sha ka sorkar. U la ong ruh ba ka UDP ka don hok ruh ban ïa kynduh ïa ka Expert Committee ban ïamir jingmut ne ban ai jingmut shuh shuh lada ki dang don ki jingai jingmut kiba thymmai ruh namar ka dei tang ka UDP kaba shim khia ïa kane ka kam.