Ka Ri Khasi kadei kaba ki ju ong kadei ka Ri tip briew tip Blei, namar naduh hyndai hynthai ka synshar ka hok ka sot bad ka tip briew tip Blei, la ka long ha ïing ha sem, ka shnong ha thaw ne ha ka imlang sahlang ruh kumjuh. Ki briew ki ju ïakren ïa kata ka sotti juk, ha kaba ka dang synshar kata ka hok ka shi kyntien. Hynrei mynta kane ka burom ka la jah noh. Mano ba wan biah phongrai ïa ka ri haduh katne katne. Hato dei na ki daw ïing ne don ki daw ba na shabar.
Mynta haba peit ïa kane ka ri ba ieit ki blei, la i sangsot ïa ka jingwan kiew ka sniew ka smeh bad ka jingshong kulai ki jingsniew kiba laiphewhar jait naduh na Sor naduh ha Nongkyndong. Ei ba ju pyrkhat ba wat tang shiphew snem mynshuwa ba u kpa un leh beijot ïa la ka khun ïa la ka pyrsa. Mano ba ju poi kynmaw ba u hymmen u shong lok jubor ïa la ka para. Hynrei kine ki jia ha kane ka juk jong ka jingpyut plak. Ka shongsang shongma, ka klim, ka jyllei ha man la ki shnong ki thaw kaba wat ki kynhun Balang ne ki kynhun niam kiba hikai ïa ka burom ka akor ha ka shonkha shong man ruh kim lah ban teh lakam ïa kane ka jingsniew. Ha ka synshar ka khadar lei lei, ka jingwan kiew kynsan kynsan ka spah ka phew ne ka tyngka pliah ha ki por elekshon, ka la long kum ka umsaw kaba wan tyllep noh ïa ka jinglong kyntang ka saiñhima sima. Ka ri bad ka jaidbynriew ka duh noh ïa ki rang ïasaid ki rang ïatai ha ka dorbar ba kyrpang ki riewsaiñdur ïa ka ri bad ka jaidbynriew. Ka dorbar ka duh noh ïa ki nia rangbah, ki kyntien shong sbai kiban ai jingkyrmen ïa u paidbah jong ka jylla. Kaba mih na kane ka long ba ka ri bad ka jaidbynriew ka duh noh ïa ka nam ka burom ha ka pyrthei ba ïar jong ka ri India ha ka liang ki riew ïasaid kum u jong u (L) Prof. GG Swell, u (L) Hoover Hynñiewta, u (L) Prof. Korbar Singh Phanbuh bad kiwei kiwei. Mynta ki dorbar jong ki riewpyrkhat bad ki riewsaiñ dur ki kylla long tang ki dorbar ïa biria bad kren ha la ka jong ka mon.
Kaba pynkha na kane ka long ba ka ri bad ka jaidbynriew ka mad ia ka bamsap ka bampong ha baroh ki kyrdan jong ka synshar ka khadar naduh na khlieh haduh ha trai duh jong ka saiñpyrthei. Ka bai sha ka percentage kadei ka nong jong ka kamai kajih jong kane ka juk. Uba lah ban ai bai sha bai percentage u kiew sted ha ka spah bym hok. Shano shuh kata ka kamai la ka jong ka umsyep bad la bun ka kamai da shong. Ki kynhun niam ki kynhun sneng kynhun kraw ki thap shalyngmat, kaei kane kaba wan lynshop. Hato kadei ka daw ïing ne ka daw bar. Haba bishar hi baroh kadei na ka daw ïing, namar ba u ksuid u khrei u la ïoh shong ha ki dohnud jong u briew ban pynshoi bad hukum ïa u ba un leh ïa ka mon jong u, ym shuh ïa ka mon U Blei.
Kaei kaba pyllait ïa u khun khasi na kane ka krem lamet ka krem latang. Mano shuh ban long u khun lymboit u khun lymbiang ban leit shaw biang ïa ka jingshai ka jingkyrmen na ka bynta u rit u ri au paid knup paid trap. Mano ban law ban loit ïa kane ka sniew ka smeh bad mano ban long u nongpyndeng sha kuriaw ha kum kane ka por. Ban da ka bor briew ym i don jingkyrmen shuh, lait noh satang ka bor Blei ka ban pyllait ïa kane ka jaidbynriew kumba u pyllait U Blei ïa ki khun Israel.
