Balei ki tieng ïa ka President’s Rule – Khyrwit tyngeh u Dy CM ïa jingkynthoh ki heh UDP

Shillong, Jymmang 30 : U Symbud Myntri Rangbah ka jylla ba dei ruh u National Vice President jong ka NPP, Bah Prestone Tynsong ha ka sngi Nyngkong u la pynphai nia da kaba tyngeh syndon halor ka jingkren jong ki heh UDP ha ka jingïalang paidbah kaba long ha Jowai ha kane ka sngi Saitjaiñ ba la dep.
Haba kren bad ki lad pathai khubor, u Bah Prestone u la ong ba u lyngoh ban ïohi ïa ka jingkam jong ki nongïalam UDP ba ki tieng ban weng na ka sorkar ïoh ka wan ka President’s Rule ha ka jylla. “Ban hanga hi ngam tieng lada wan President’s Rule ne wan sa kaei kaei ruh ngam tieng. Lada phi shem ba la bakla shisha balei ban kren ba tieng ïa kata tieng ïa kata. Ha ka jingshisha lada sngew ba ka sorkar MDA hapoh ka jingïalam jong ka NPP ka la sniew haduh katta katta nga sngew ba ka la bha palat ban wan ka President’s Rule mardor ym dei ban ap wat tang shisngi ruh,” ong u Bah Prestone.
Shuh shuh u ong ruh ba imat ki heh UDP ki kren da ka jingsngew shongshit ha katei ka jingïalang. “Tangba kynmaw bha bad pynkynmaw ïalade ba por elekshon nga ju ïohi bha ba ka don beit ka jingkawang ktieh. Hynrei ngi na ka liang ka NPP ngin ym kawang ktieh ïano ïano ruh, ngin pyni ïa u paidbah ïa la ka nongrim kaba ngi mut kaba ngi trei bad kaba ngin nang trei bad ngin ym ïa don por ban ong ba kata ka party kumta,” u la bynrap biang.
Ha kajuh ka por u ong ruh ba ki nongïalam UDP lada ki ïohi ba ka jingsniew ka la jur palat kim dei shuh ban ap ïoh ka nang sniew. “Leh aiu da wan ka President’s Rule, ieh kan wan noh ka elekshon bad u paidbah un rai. Tangba haduh katno u paidbah un sngewthuh ïa kata ka jingkren. Haba nga ïohi ïa katei ka jingkren nga da phuh samrkhie bad ngam lah ban sngewthuh.”
U Bah Prestone u la ong ba kaba phylla ka long haba don ka Coordination committee ym ju don ba kren eiei. U ong ruh ba kaba kham phylla ka long ba da don tang ka jingïalang ka MDA ruh ym ju don ba kren. “Ha ka jingshisha ki dei ban pynmih kum kita ki mat ban ïakren ban ïasyllok, hynrei kum kata ym don namar wat ïa ka kam khappud ruh haba kren ne batai ki ong ka lah biang, hynrei mynta shabar pat mih kita kita haduh ba ym lah shuh ban sngewthuh.”
Nalorkata u la pynkynmaw ruh ba u la ïohi ba kumno ka sorkar khlew khaw lang ka long khamtam naduh u snem 2003 haduh 2018 kiba ynda la jan ka elekshon ki sdang ban tei pop ïa ka party kaba kham heh da ka thong ban pynbiej ïa ki paid nongthep vote.