B alei kein haduh katne katne namar katba dang pyrkhing ban pyntreikam ïa ki kyndon aiñ ban khang lad ïa ki jingshah thombor ki kynthei khynnah ha kane ka jylla katta dang jur palat pynban ki kam leh thombor, leh beijot, pyniap ïa ki khynthei khynnah, namar katba nang mih ki sngi katta nang jur kita ki kam thombor, kam lehbor, kam pyniap ïa ki kynthei khynnah ba dang rit kiba pli. Kane ka la buh ka jingkylli kaba khraw haduh katno keiñ ki khun ki kti jongngi ki im ban lait na ka jingma ha kane ka juk ba mynta namar ki im beit hapdeng ka jingshong syier, Balei keiñ ka jia haduh katne ?
Ym lah ban len la jan man la ka sngi la ïohi beit ïa ka jingjah rngai , jingshah pyniap , shah lehthombor ne shah leh beijot jong ki khynnah kata ym tang ïa ki samla hynrei mynta ka la jia ïa ki khynnah rit beit. Ha ki por ba mynshwa ym da ju ïohsngew koit ïa kita ki jingshah leh beijot jong ki kynthei khynnah hynrei mynta pat la ïohi ba kane kam thombor bad leh beijot bad shah pyniap ki kynthei ka la nang kiew na kawei ka sngi sha kawei pat.
Halor ka jingshah leh beijot bad shah pyniap jong kawei ka khynnah skul ha Ri Bhoi ka long kaei kaei kaba sngewtriem ban pyrkhat namar ka jia mynsngi mynshai kata ruh ym da jngai na la ïing. Kane kaba pli ka khynnah kaba dang 13 snem ka rta da ka mynsiem kohnguh sneng ïa la ka kmie haba ka la wan phai na skul ban leit sha ïing ka la ïa kynduh ïa ka kmie ha shiteng lynti bad ka kmie ka la bthah ba kan leit shim ïa ki kot ki sla na ïing u Rangbah Shnong hynrei haba kam poi ïing shuh katno katno ruh la sdang ban ïa wad naduh ka por janmiet bad lap ïa ka metiap jongka da lah dum ka bneng kumba 7.30 ei ei mynmiet. Kiba kum kine ki jingjia ki la ïai jia na ka por sha ka por ym tang ha katei ka District hynrei ha kylleng ki district jongka jylla Meghalaya.
Dang ha kine ki khyndiat por arngut ki khynnah ki la shah pyniap ha ka shnong Nongrah, Shillong iwei iba dang saw snem ka rta bad iwei iba hynniew snem ka rta. Hooid ïa itei iba dang saw snem, ki pulit ki la ïoh kem ïa u briew uba leh uba dei u khynnah uba ïalam kai ïa i hi da kaba u phla ba i ngam jyllop ha i um iba sahkut ha ka ïing ba dang shna. Hynrei kane ka jingphla jongune u khynnah kam pat pynhun satia ïa kiba bun ba lang namar kim lah ban ngeit kumno kane kan jia ha itei i um iba jyndong bha nalor ba ym don dak mong ei ei ruh em. Katba ïa itei i heprit shynrang ba hynniew snem ka rta ym pat lap ksai haduh mynta ruh namar ki pulit ki dang pynlong ka jingtohkit ba bniah lyngba ka kynhun ba la thung kyrpang ka Special Investigation Team (SIT) ba la khlieh da u SP (City) bah Herbert Marbaniang.
Nalor kane ha kiba bun ki khep ïa kiba shah kem la set beit shwa ha byndi ki pulit ban ïoh tohkit bniah ïa ki bad la ïoh ruh ka jingkular na ki pulit ba kin pynngat beit ïa ki ha ki kyndon aiñ ba pyrkhing bha hynrei kaba pynlyngngoh ïa kiba bun balang ka long ba tang shu poi ha khmat ïing bishar kitei ki nongleh kam bymman ki la ïoh jamin beit.
Hooid na ka liang ki bor pulit ki la shim khia ban pynngat beit ïa kito kiba donkti ha ki kyndon aiñ kiba pyrkhing bha hynrei ka long kaba eh pat namar tang shu poi ha khmat ïing bishar ki la ïoh jamin beit.
Ki kam leh beijot bad shah pyniap ki khynthei khynnah ki la nang kiew na uwei u snem sha uwei pat u snem, kaei kaba donkam ka long tang ka jingïatrei lang lang naduh ki bor pulit ki bor jong ka ïing bishar, ki nongïasaid aiñ ba kin nym pyrkhat tang ïa ka jingmyntoi shimet hynrei ki dei ban pyrkhat ruh na ka bynta ka jingshngaiñ jong ki kynthei khynnah namar lada ym don ka jingïatrei lang jong baroh ki liang kiba ïadei ïa ka kam kan long kaba eh ïa ki bor pulit ruh ba kin kem ïa ki briew kiba leh runar namar tang hadien katto katne por ba ki shah set phatok ne shah set ha byndi ki pulit ki la lait jamin noh bad bunsien ka buh pynban ïa kito ki longïing kiba ngat ha ka apot ban tieng ban smiej namar ba tlot ki bor ka aiñ. Nalor kane donkam ruh ka jingïatrei lang naduh ki bor shnong bor thaw, ki seng bhalang khnang ba ki riew bymman ne ki runar kin ym ïoh lad ban leh ïa kane ka kam. Namar lada ki bor shnong bor thaw bad ki seng bhalang ki ïoh bat bad ai jingsneng ïa ki runar khlem pep ki riew runar kin hap ban pyrkhat arsien shwa ban leh ïa kino kino ki kam runar kiba pyntriem ïa ka imlang ka sahalng.
