Shillong, Nailur 20: Ka Seng HYC ka la phah ka shithi sha u Myntri Rangbah ka jyklla, u Conrad Sangma ha kaba ïadei bad ka aiñ ïakhalai haka jylla.
Kane ka shithi ba la phah da u Bah Roy Kupar Synrem, General Secretary ka ong ba , ka Sorkar u Conrad Sangma, wat hapdeng ka saw ka sian bad ka lynga pisa jong ka Jylla ha ka por ba don ka Khlam Covid-19, ka la pynbna ïa ka Meghalaya Regulation of Gaming Ordinance, 2021. “Kaei ka jingdonkam ba kyrkieh haduh katta ba donkam ban sdang ïa ki kam Khalai ha ka Jylla kaba la pynlong ban wanrah ïa ka Orinance, ngi dum ka buit ka bor ban pyrkhat”, la ong u Roy.
Hadien kata ka Sorkar ka lah pynkylla noh sha ka Aiñ ba pura ha Assembly bad shna pat ïa ka Meghalaya Regulation of Gaming Act, 2021.
Kaba kham pynkyndit ïa ki paidbah ka long ba ka Sorkar ka wanrah ne pynbna ïa ka Meghalaya Regulation of Gaming Rules, 2021 ha ka 21 tarik u Nohprah, 2021, kata tang Saw (4) sngi shuwa ka sngi ba khraw ki Riew ngeit Khristan ha ka Jylla ha ka por bar oh ki ïa pynkhreh ban rakhe ïa kane ka sngi bakhraw ha ka jing ngeit jong ki paid riew ngeit Khristan. Balei lah leh ha kum kane ka por, kata tang kane ka Sorkar kaba lah ban batai.
Shuh shuh ka Seng ka ong ba, katkum ka Jubab u James Sangma ha Ing Dorbar Thaw aiñ, lah pyntip ba lahdep ban ai ïa 3 tylli ki Licence sha ki riew shimet ne ki kompeni bad kumjuh ruh ba ka Sorkar ka lahdep ban thung ïa u Chairman bad ki dkhot jong ka Gaming Commission.
Hadien kane u Conrad Sangma u lah pyntip hapoh ka ïing dorbar Thaw aiñ bad lyngba ki lad pathai khubor ba ka Sorkar naduh u bnai Jymmang 2022 ka lah pynsangeh noh ïa kano kano kam ba ïadei bad ki jaka ia khalai hadien ba lah mih ki jingpyrshah kiba bun.
Ka HYC ka ong ba kane ka jingkren jong u Conrad Sangma kam ïahap satia bad ka jubab kaba la ïoh lyngba ka RTI na ka ophis u Commissioner of Taxes lyngba ka shithi No.CTA-26/2009/Pt-VI/58 dated Shillong, the 17th August, 2022 namar katkum ka jubab kaba ka Seng ka ïoh, ka kren shai ba ka Department ka dang ïaid shakhmat ban peit bad bishar ïa ki aplikeshon na bynta ki kam khalai katkum ka Act bad ka Rules. Kaba mut ba haduh u Nailar, 2022 ka Department ka dang bishar ïa ki aplikeshon. “Haba kumta ngin ngeit ïano, ia u Conrad Sangma ne ïa ka ophis u Commissioner Taxes?”, la ong ka Seng.
U nongïalam ka HYC, u ong ruh ba ka jingkren jong u Conrad bad ka Sorkar ba yn nym shah ia ki trai ka Jylla ban leit rung sha ki jaka ia khalai ruh ka long ka ei kaei kaba shu pyndep rukom namar ha ka Rule 18(b)(x) lah shu thoh ba kan dei ka kamram jong ki Nongpyniaid ïa ki Jaka ia khalai ban buh ïa ki Notis ha kita ki jaka ba yn shah tang ïa ki briew kiba na bar jylla ban ïa khalai. Ym don kano kano ka kyndon ka ban ai bor lane ban buh ïa ki bor sorkar kum ki pulit ha kine ki jaka na ka bynta kane. Wat lada u Conrad u ong ba ki pulit ki lah ban check bad pyntikna ba ki trai jylla kin nym rung ha kine ki jaka, na ka liang ka Seng ngi sngew ban pynpaw ba ïoh lehse kane kan dei pynban ka kabu ïa kito ki Pulit kiba mlien ka ban kamai bamsap ban ïoh kit pisa na kum kine ki jaka. Ka jingai bor ha ki Nongpynïaid ban pyntikna ïa ki nongwan ïakhalai la kidei ki bar jylla ne ki trai jylla ka long kamkai namar kat nang wan ki briew ban ïa khalai katta ka jingïoh nong ka jong ki. Te kumno ngin mutdur ba kin ïa pyntreikam da kine ki Licencee hi ia kaba kum kane ka Kyndon.
Lehse ki Trai Jylla ki lah ban shah khang ha ki kam Khalai hynrei ki lah pat ban leh ïa kiwei kiwei ki kam sniew ha kiba kum kine ki jaka la ka long ki droks bad ki kam awria. Kumno yn pyntikna pat ba kum kine ki kam kin nym ïoh ban leh da ki Trai Jylla ha kine ki ktem ia khalai.
Ym dei tang ki ktem ïa khalai yn shah lyngba kane ka Aiñ hynrei ka jingktah kan wan ruh lyngba ki Khalai online namar ym don kyndon ban pyntikna ba ki khynnah kin nym ioh ban ia khalai online. Ka Rules ka shu kdew bad ong ba kan dei ka kamram jong ki Nongpyniaid ban pyntikna ba ki briew ba ia shim bynta kin dei kiba lah 18 snem shaneng. Kaba mut ba wat ki khun samla ka Jylla kin sa ngop ha kine ki kam khalai bad kane kan wanrah ïa ki jingeh kiba bun ha ka imlang sahlang bad tang shu lah long addict ha kine ki kam khalai, kan lam pat sha ka tuh ka thiem, ka thok ka shukor bad ka jot ka pra ha ki ing ki sem bad khamtam ia ki khun samla.
Ka jingkren jong u Conrad ba ki Trai Jylla kin nym ïoh ban ïa shim bynta ha ki kam khalai ruh kam shai bha namar ha ka Act bad ka Rules, ki don ruh ka kyndon ban shah ïa ki Seng ne kynhun ki Riew shimet ban pyniaid ïa ki jaka ia khalai ha ki shnong ki thaw ne ki dong ki thain ka jong ki. Kaba ngi kwah ban tip na u Conrad Sangma bad u James Sangma, ka long ba hato ha kum kine ki jaka ïa khalai kiba long ha ki Shnong ki thaw, yn wan ia khalai da kita ki ‘Tourist’ a bar Jylla ne Bar ri? Ne kin ia khalai da ki briew na kita ki shnong ki thaw bad ki marjan shnong? Haba kumta, kata ka jingong jong ki ba yn nym shah ïa khalai ia ki Trai Jylla, ka don nongrim ei ei?
Ka Seng ka dawa ba dei ban Repeal ne pyndam noh ïa ka Act bad Rules mardor, nangta dei ban weng noh ïa u Chairman bad ki Member ka Gaming Commission, khnang ba kan nym sepei ka pisa paidbah ban siew tulop ïa ki bad kumjuh ruh ban weng noh mardor ia ki 3 tylli ki License kiba lah ai da ka Sorkar.
