Balei ka Sorkar Jylla kam shna aiñ ban mang kam 80% ha ki Private Sector?

Ka seng Hynñiewtrep National Youth Movement (HNYF) ka ïawer ïa phi ban ïa don bynta lang ha ka jing dawa jong ka seng na ka bynta ban pynbor ïa ka Sorkar ban thaw ïa ki aiñ ki kanun ban buh kyrpang ïa ki kam ki jam ha ki Private Sector kumba 80% na ka 100% ïa ki khun samla ka Bri u Hynniewtrep.
Ki bynta ba pynlong ïa ka Seng ban dawa ïa ki aiñ ki kanun ban buh bhah kyrpang ïa ki kam ki jam ha ki Private Sector ka dei namar ba ki kam ki jam ha ki tnad Sorkar ki la jan dap lut, kumba ka juk hi ka ïaid ha salonsar ka pyrthei ngi ïohi ba dei tang ki Kompeni hi kiba lah ban thawlad bad ban saiñ dur kumno ban ïohkam ïohjam ki khynnah samla ka ri. Ngi ju ïohi barabor ba ka Sorkar ka kren bad ka pynpaw sha ki khun samla ka Bri u Hynñiewtrep ba kan wanrah ïa ki kompeni bapher bapher sha kane ka jylla jong ngi na ka bynta ban ïohkam ïohjam ki samla ka ri, hynrei haduh mynta hi ka Sorkar ka lah ban wanrah tang khyndiat eh kita ki kompeni sha ka jylla Meghalaya.
Haba ngi phai pat khyndiat sha ki katto katne tylli ki kompeni bad kharkhana kiba la seng kam ha kane ka jylla Meghalaya, ngi shem ba ka jingïohkam ïohjam ba bun hi ka leit sha ki bar jylla, ym sha ki trai ri trai muluk. Wat tang 5% ruh ki samla ka ri kim don kiba ïohkam ïohjam ha kine ki kompeni bad kharkhana. Ka jing kylli ba mih ka long ba balei ka leit jia kumne? Hato dei tang ka kamram jong ki sengbhalang ban peit ïa kine? Shaei jah ki nongshna aiñ lane kita ki MLA, kiba ki paidbah ki la jied, ban shna aiñ bad ban ïada ïa ka hok ka jong ki?
To ngin ïa phai khyndiat shaphang kiei kita ki Private Sector. Ki Private sector ki dei, kino kino ki kompeni ki bym dei jong ka Sorkar lane ki bym pynïaid da ka Sorkar hynrei ki kompeni kiba long trai da u riewshimet lane ki kynhun jong ki riewshimet kiba ïalum lang ban treikam kum ka kynhun ïa kajuh ka kam bad ha kajuh ka kyrteng.
1. Shi bynta lada ngi ïa kren ïa ki kam ki jam ha ki Banking Sector lane ki Private Banks kum ka HDFC, AXIS, INDUSIND Banks bad kiwei kiwei ngi shem ba ki rukom them kam thep jam ha kitei ki Kompeni la shu tip sopsop tang da ki katto katne bad ka jingthep kam hi ruh ka dei beit da ka jingpynïaid da ki ophisar jong kitei ki Bank na shabar.
2. Ha kiwei kiwei pat ki Sector kum ki Private Educational Institute la shu thung kam tang naba ki don ka jingïadei bad ki nongpynïaid jong kitei ki Institute khlem da don kino kino ki jingpynbna ha ki lad pathai khubor khnang ba baroh kin ïa tip lang.
3. Ka Tourism Sector ka dei kawei na ki lad pynïohkam ïohjam ïa ki khynnah samla bad ngi da ïohi shisha ba bun na ki samla jong ngi ki la tbit bha ban trei ha kine ki kam. Ka Meghalaya hi ruh ïa mynta hi,ka la dei kawei na ki Top Destination ha ka laiñ jngohkai pyrthei ha ka ri India. Hynrei wat hangne ruh ngi ïohi ba bun na ki samla ka ri ki hap ban leit trei shabar jong ka Jylla namarba ka Sorkar kam lah ban khring lane ban wanrah ïa ki Kompeni ban shna ïa ki Five Star Hotel, ki Amusement Park ba kiwei kiwei khnang ban shna lad shna lynti ban ïohkam ïohjam ki samla ka ri. Lada ngi kren shaphang ki Five Star Hotel ngam lah khlem da buh jingkylli ïa ka Sorkar, ba balei haduh mynta ym lah shuh ban pyndep ïa ka Crowborough Hotel? Lada ka jingkitkhlieh jong ka Sorkar ka long tang kumne, kan kham bha ïa ki Politishian jong ngi ba kin ym pynmih shuh ïa ki kyntien, “Ki samla ki dei ki lawei jong ka jaidbynriew.” Phi ki Politishian phi ladei ban sngewlehraiñ ban kren ïa kajuh shi kajuh tang na ka bynta ba phin ïoh ïakhring Vote. Haba phai sha ki Hotel rit kiba don ha kylleng ka jylla la ïohi ba ki nongpynïaid bad ki nongtrei kiba bun dei hi ki bar jylla. Ka jingkylli kaba mih hangne ka long hato kita ki samla jong ngi kiba leit trei sha ki Sorbah ka ri India kim pat lah mo ban trei ha kine ki Hotel kiba don ha sor Shillong. Balei hap mih na Jylla lajong, haba, lada ka Sorkar ka shimkhia ban shna ïa ki aiñ ki kanun ban buh kyrpang ïa ki kam ki jam ïa ki samla ka ri, ngin jin da pahuh ban jied ïa ki kam kiba ngi donsap ban trei.
4. Ki Manufacturing Industries kiba kynthup ïa ki Steel and Alloy Factories, Sawmills, Plywood, Cement bad kiwei kiwei, ki don ka bynta kaba khraw bad ki lad ki lynti kiba bun na ka bynta ban aikam aijam ïa ki samla ka Bri u Hynñiewtrep.
Na ka liang ka HNYM ngi la ju kynduh barabor ïa kine ki longheh jong kine ki Kompeni bad ngi la ju ïakren barabor ba ki dei beit ban thungkam ïa ki trai jylla, hynrei ka jubab kaba ngi ïoh ka long beit ba ki la thung ïa ki trai shnong bad kita ki trai shnong ki dei tang na ka shnong ba don kita ki Manufacturing Plant (Factory) ki jong ki. Hato lada ka Factory ka don ha Byrnihat lane Lumshnong ki samla na Shillong ne Nongstoiñ kim lah seh ban ïohkam ïohjam ha kine ki Factory. Ka jubab kaba ar kaba ngi ju ïoh, ka long ba ki samla jong ngi kim lah ban trei ïa ka kam bad ki long kiba jaituh. Ha baroh ki jaidbynriew don beit uba smat bad ba jaituh, ym baroh u samla Khasi u ba jaituh. Kine ki daw dei tang ki daw kai, ka jingshisha ka dei beit ba kine ki kompeni ki kwah ban aikam tang ïa ki briew ki jong ki hi ym ïa ki samla jong ngi.
5. Kiei ki kam ba ki samla jong ngi ki lah ban trei ha kine ki Factory. Ki kompnei haba ki seng ïa ki Factory ki donkam shibun ki jingkyrshan na kiwei pat ki bynta treikam. Kawei na ki kam ba ki samla jong ngi ki lah ban treikam ka dei ha ka bynta jong ka Logistic lane Transportation. Kino kino ki samla kiba don jingthmu ban trei ki lah ban ïashim bynta ha katei ka kam. Ki Factory ki donkam ïa u mawshun ha ki Karkhana pynmih dewbilar, ki dieng ha ki Sawmill bad Plywood Factory ki Scrap lane ki tiar jot ha ki Alloy and Steel Factory. Ki don shibun ki mar ha ka jylla jong ngi ba ki samla ki lah ban ïabuh da ki kali lajong ban trei ïa kine ki jaitkam.
6. Ki kam Contract bad Sub-contract ha kaba ïa dei bad ka suplai ïa ki mar ki mata sha kine ki Factory.
7. Ki kam ki jam ïa ki khynnah samla kiba la dep ïa ki jingpule ki jong ki la ka dei ha ki liang Administrative ne ha ki Technical Line katkum ki kyrdan bad ki jingtbit ba ki la ïoh. Ka Sorkar ka la pynlut da ki hajar klur ka pisa paidbah ban wanrah ïa ki kam pynroi sha ka jylla jong ngi khamtam ha kaba ïadei bad ki kharkhana ban ïohkam ïohjam ki samla ka ri. Ka Sorkar ka ladep ai Subsidy bad khusnam (incentives) ïa kine ki kompeni ha ki liang bapher kum ka Transport Subsidy, Power Subsidy bad kiwei kiwei. Nga ngeit skhem ba baroh ngi dang ïa kynmaw ba ka Sorkar ka ai Ar (2) klur tyngka sha ka phlim Rock On II. Ym dei ba ngi bishni ba ka Sorkar ka ai khusnam (incentives) ïano ïano hynrei namar ba ka dei ka pisa jong ngi u paidbah, ngi dei ban tip bad ban ïoh jingkheiñ ka ei ka jingmyntoi ïa ngi ki samla haba ngi ai khusnam ïa ki kompeni kiba wan shane sha ka jylla ka jong ngi.
Ka Seng ka kwah ban buh jingkylli kumne sha ki samla ka Bri u Hynñiewtrep, “Hato kumno phin shim ïa ka jinglong rangbah haba ki lad ki lynti ba phin ïoh kam ïoh jam kim plie? Kumno phin pynurlong ïa ki jingkular jong phi ïa i samla baieit jong phi ban poi sha ka ïathoh shong kurim kaba donburom? Kumno phin buh ïa ka bam ha ki pliang jong ki khun jong phi? Kumno phin leh haba ki lad ki khang ïa phi?” Ko ki khun samla ka Bri u Hynñiewtrep to khie naba thiah bad to shut la u khulom, la ka jabieng ban ïakhun ban pynbor ïa ka Sorkar ban wanrah ïa ki aiñ ki kanun ban biang ki kam ki jam ia ka mynta bad ïa ka lawei ka ban sa wan.
Ko, phi ki kmie ki kpa jong ki samla ka Bri u Hynñiewtrep ka jingkylli ïa phi ka long, “Hato phi la ïa ïoh thiah suk bad phim khuslai shuh hadien ba ki khun samla jong phi ki ladep ïa ki jingpule ki jong ki? Hato ki khun samla jong phi ki la ïa biang kam?“ Lada ka jubab jong phi ka long ‘hooid’ ngi dang ïa khuslai bad ngim pat ïoh thiah, te wan ïasnohkti lang bad ngi ba ngin ïa pynbor ïa ka Sorkar ba kan shna ïa ki aiñ ki kanun ban buh kyrpang 80% na ka 100% ïa ki kam ki jam ha ki Private Sector na ka bynta ki samla ka Bri u Hynñiewtep ha ka jylla Meghalaya.
Ngi pdiang burom ïa ki kompeni ban bei pisa bad ban buh kharkhana ha kane ka jylla jong ngi. Ïa ki kharkhana kiba la don shuwa hangne, ngi la ai ïa phi ïa ki marpoh khyndew jong ngi, ka um ba thiang, ka lyer bakhuid, ka mariang ba pyngngad kiba dei ki jong ngi, hynrei kaei kaba ngi donkam na phi ka dei ka kam ka jam ïa ki samla jong ka Bri u Hynñiewtrep.
Khatduh ïawai, lada kiwei kiwei ki jylla kum ka Haryana, ka Maharashtra, ka Karnataka bad kiwei kiwei ki ladep buh kyrpang ïa ka bhahkam bhahjam ha ki Private Sector ïa ki samla ka jylla jong ki, te balei ka Sorkar Meghalaya kam lah. Hato ka dei ka jingñiewbeiñ jong ka Sorkar Meghalaya ïa ki khun samla ka ri ne dei ba kim don jingkitkhlieh ïa ka bha ka miat ki samla ka ri lehse ïoh dei ba kim don ïa ka jabieng ban pyrkhat ba ka shongsuk shongsaiñ ha ka jylla, kan wan ynda ki khun samla ki biang kam biang jam.
Kaba khatduh hi ka dei ka kamram jong ngi ki paidbah ban pynsngew ïa ki skhor ba kyllut jong ka Sorkar ban ïoh kheit ïa u soh uba thiang na ka bynta ka mynta bad ka lashai jong ka jaidbynriew.